په‌یوه‌ندیێن بهێز د ناڤبه‌را هونه‌رێ كوردی و یێ بیانی دا نینن
سلێمانیێ، عه‌زیز هه‌ورامی:
هونه‌رمه‌ند (ره‌حیم عومه‌ر) د دیداره‌كێ دا بۆ رۆژناما ئه‌ڤرۆ گۆت: پشتی خواندنا خوه یا ئه‌كادیمی د بۆارێ شانۆ و سینه‌مایێ دا من ب دووماهی ئینای، وه‌ك ئه‌كته‌ر من پشكداری د سێ درامادا كریه، یا ئێكێ (دوا شه‌و) كو ژده‌رهێنانا كارۆخ ئیراهیم و دراما (چه‌رخ و فه‌له‌ك) ژده‌رهێنانا بیلال شاكر و دراما (گۆركه‌كان) ژده‌رهێنانا مێهران شێری بوو، هه‌روه‌سا نێزیكی پازده كورته فلمێن سینه‌مای.
هه‌روه‌سا گۆت: ئه‌و كۆمپانیێن ڤان فلمان یان كورته فلمان به‌رهه‌م دئینن چاڤێ وان یێ ل وێ چه‌ندێ پاره‌كێ كێم بمه‌زێخن، له‌ورا دانانا پلانان بۆ پشته‌ڤانیكرنا كارێن هونه‌ری چ ژلایێ حوكمه‌تێ ڤه، چ ژی ژلایێ كه‌رتێ تایبه‌ت ڤه ب پێنگاڤه‌كا گرنگ دبینم، چنكو گه‌له‌كا گرنگه كاری بۆ پێشڤه‌برنا ئاستێ هونه‌رێ كوردی بكه‌ین ژهه‌موو لایه‌كی ڤه، چنكو ئه‌ڤه (35) ساله مه سینه‌ما یا هه‌ی و پێدڤیه پتر پێشڤه‌ببه‌ین، چنكو مه ب سه‌دان شۆڕه‌ش و داستان هه‌نه پێدڤیه بهێنه نڤسین و ب رێكا سینه‌مایێ بگه‌هنه خه‌لكێ بیانی، چنكو هه‌تا نوكه په‌یوه‌ندیێن بهێز دناڤبه‌را هونه‌رێ كوردی و یێ بیانی دا نینن.
