ئه‌كرم هه‌سنی: شانازیێ ب وان وێنان دبه‌م یێن كو ب كامیرا من هاتینه گرتن.
دهۆك، شاكر ئه‌تروشی:
مه‌دیاكارێ دێرین (ئه‌كرم هه‌سنی) د دیداره‌كێ دا بۆ رۆژناما ئه‌ڤرۆ گۆت: ئه‌ز ل سالا 1966 ل گوندێ جفتكێ سه‌ر ب ده‌ڤه‌را زۆمار ڤه ئه‌و ژ دایكبوویمه و ل 1988 ل ئاواره‌یێ ل وه‌لاتێ ئیرانێ ژبه‌ر حه‌زا من بۆ وێنه‌گرتنێ من كامیره‌كا قۆتۆ بۆ خوه كری و ل ده‌ستپێكێ من وێنه بۆ پێشمه‌رگه‌ی دگرتن، هه‌روه‌سا هنده‌ك جاران ژی وێنێن دیمه‌نێن گوندان و سرۆشتێ كوردستانێ و شانازیێ ب وان هه‌موو وێنان دكه‌م یێن كو ب چافكێ كامیرا من هاتینه گرتن.
هه‌سنی گۆت: ل ده‌ستپێكێ ئه‌و پێشمه‌رگه و سه‌ركردێن من وێنه بۆ دگرتن ل سه‌ر سنۆرێ وه‌لاتێ ئیرانێ و هه‌رێما كوردستانێ بوون، ئه‌ز دچوومه ئیرانێ من بۆ چاپ دكرن، پشتی سه‌رهلدانێ ئه‌ز زڤڕیمه دهۆكێ و بۆ ده‌مه‌كی من ل راگه‌هاندنا لژنا سێمێلێ یا پارتی كاركر، پشتی ڤه‌بونا ته‌له‌فزیۆنا كوردستان یا ناڤه‌ندێ ئه‌ز یۆ وێرێ هاتمه ڤه‌گوهاستن، پاشان ده‌زگه‌هێ سه‌ته‌لایتا كوردستان ڤه‌بوو ئه‌ز چوومه و ێرێ و نوكه ل پشكا ئه‌رشیفی ل كه‌نالێ كوردستان یێ عه‌سمانی كاردكه‌م، هه‌روه‌سا هنده‌ك جاران وه‌ك وێنه‌گر و مۆنتێر ژی، بۆ زانین ل ده‌مێ ده‌ستپێكرنا شه‌رێ داعش وه‌ك وێنه‌گر چوومه سه‌نگه‌رێن شه‌ری و من گه‌له‌ك دیمه‌نێن زیندی یێن شه‌ڕێ پێشمه‌رگه‌ی دژی داعش وێنه‌كرینه و ئه‌و دیمه‌ن ل چه‌ندین كه‌نالێن ناڤخۆی و ده‌رڤه هاتینه به‌لاڤكرن، بۆ زانین ده‌مه‌كی من كاریكاتۆر ژی چێدكرن و گه‌له‌ك كاریكاتۆرێن من ل رۆژناما پێشكه‌وتن هاتینه به‌لاڤكرن و ده‌رباره‌ی وێنێن من گرتین ژی گه‌له‌ك ژوان نه‌ماینه و گه‌له‌ك ژی نوكه ل ئه‌رشیفێ مه‌كته‌ب سیاسی دپاراستینه، هه‌روه‌سا ل دووف داخوازا به‌رێز فازل میرانی من گه‌له‌ك وێنه داینه وی، هه‌روه‌سا گه‌له‌ك وێنه ل مالا خودێ ژێ رازی شه‌هید فه‌له‌كه‌دین كاكه‌ی هاتینه پاراستن.
