ئه‌لمانیا: ئه‌م ناهێلین چو شه‌ڕ د ناڤبه‌را رۆسیا و ناتۆیێ دا روو بده‌ت
ب، سه‌رجان مه‌حمود:
ئۆلاف شولز شیره‌تكارێ ئه‌لمانیا د داخۆیانیه‌كێ دا بۆ ده‌زگه‌هێن راگه‌هاندنا ئه‌لمانیا دیار كر كو رۆسیا رێككه‌فتنا به‌ری نها یا سه‌باره‌ت ب پاراستنا سنۆران بنپێ كریه و ب هه‌موو شیانێن خوه ئێرشی ئۆكرانیایێ دكه‌ت و دڤێت ئاخا وی وه‌لاتی داگیر بكه‌ت و گۆت: (ئانكۆ ب ره‌نگه‌كێ ئاشكرا رۆسیا په‌یمان و رێككه‌فتنێن نێڤده‌وله‌تی یێن سه‌بارت ب سنۆرێن د ناڤبه‌را وه‌لاتان دا بنپێ كریه و بۆ ڤێ چه‌ندێ بێگۆمان ئه‌م پشته‌ڤانیا ئۆكرانیایێ دكه‌ین و دڤێت رۆسیا شه‌ڕی بده‌ته راگرتن و بزاڤا هندێ بكه‌ت هه‌موو پرسێن هه‌ی ل گه‌ل ئۆكرانیایێ ب رێیا دانوستاندنان چاره‌سه‌ر بكه‌ت، لێ مخابن هه‌تا هه‌لوه‌ستێ رۆسیا یێ باش نینه).
شیره‌تكارێ ئه‌لمانیا هه‌روه‌سا راگه‌هاند كو دڤێت هه‌موو وه‌لاتێن جیهانێ ب تایبه‌تی ژی یێن ئێكه‌تیا ئۆرۆپا د هشیار بن و گۆت: (ئۆكرانیا داخوازا فرۆكێن شه‌ڕی دكه‌ت لێ مه نه‌ڤێت جارێ فرۆكێن شه‌ڕی بده‌ینه ئۆكرانیایێ، ژ به‌ر كو درێژبوونا شه‌رێ نها ل ئۆكرانیایێ د به‌رژوه‌ندیا ئێكه‌تیا ئۆرۆپا و وه‌لاتێن دی یێن جیهانێ دا نینه، وه‌كو ئه‌لمانیا مه دڤێت شه‌رێ نها بهێته راگرتن و پرسێن هه‌ی ب دانوستاندنان بهێنه چاره‌سه‌ركرن ژ به‌ر هندێ ژی مه نه‌ڤێت فرۆكێن شه‌ڕی بده‌ینه ئۆكرانیایێ).
ناڤهاتی د دووماهیا ئاخڤتنا خوه دا ئه‌و یه‌ك ژی دیار كر كو ئه‌و ئاماده‌نه بۆ راوه‌ستاندنا شه‌ڕی ل گه‌ل پۆتینی ده‌ست ب دانوستاندنان بكه‌ن، چونكی دیالۆگێ رێیا هه‌ری راست یا چاره‌سه‌ریێ یه و گۆت: (به‌ری نها من چه‌ندین جاران ب رێیا ته‌له‌فونێ داخواز ژ پۆتینی كربوو شه‌ڕی راگریت، جاره‌كا دی ژی دێ ل گه‌ل پۆتینی ئاخڤم و دێ بۆ وی دیار كه‌م كو وه‌كو ئه‌لمانیا ئه‌م ل دژی شه‌ڕی نه، هه‌روه‌سا ب چو ره‌نگه‌كێ ژی مه نه‌ڤێت شه‌ڕ د ناڤبه‌را ناتۆ و رۆسیا دا روو بده‌ت).
