كارۆكی خەمێن دلێ خوە ب سترانان درەڤینت
ئەڤرۆ
هەرهین محەمەد:
مەجید كارۆكی، سترانبێژَ كوچكو دیوانان دیدارەكێ دا بۆ بەرپەرێ هونەری یێ رۆژناما ئەڤرۆ گۆت: هەركەسێ ئاشق و شەیدایێ كەلتورو وەلاتێ خوە بیت ب پشتراستی ڤە دێ رێزێ ل فلكلۆرێ خوە ژی گریت و دێ گوهداریا ستران و فلكلۆرێ خوە كەت، چونكو فلكلۆر پێناس و هەبوونا هەموو مللەتانەو پتریا وان سترانێن ئەز حەزژێدكەم ئەو سترانن ئەوێن رویدانەك ل پشت خوە هێلای و دەربرینێ ژ چیرۆكەكا راست دكەت ، چونكو دكەڤن دا زلم و زورداری ژلایێ كەسێن دەستهەلاتدارڤە دهاتەكرن و ل وی دەمی میدیا و تەكنەلوژیا نەبوون و هەموو ب ستران دهاتنە توماركرن، لەورا شەیدایێ وان سترانان مە یێن ژ راستێ هاتین.
كارۆكی زێدەترژی گۆت: گەلەك جاران ل دیوانان مەستران دگۆتن ب شەڤ هەتا كو دبۆ سپێدە و چو ژ وان سترانان ژی دوبارە نەبوون و ئەم ژی نەدوەستیاین، چونكو مەحەزژ ستران گۆتنێ یا كری و هەموو دەمان بۆ من ستران دگۆتن وی دەمی یا خوەشە دەمێ ل دیوانا كەسێن ب تەمەن دروینم و هەكەمن خەمەك ژی هەبیت ب ستران گۆتنێ خەما خوە ژی ڤە درەڤینم و هەروەسان ستران ژ دلی دەردكەڤیت و دگەهیتە دلێن كەسێن بەرامبەری مرۆڤی و سترانا فلكلۆری مولكێ چ كەسان نینە و كەسی َماف نینە دەستكاریێ تێدا بكەت و گەلەك جاران من گوهداریا سترانبیچژن سەردەم كریە و تكێستێت سترانی َوەكو خوە دبێژن و دبینم ئەڤە ژی دبیتە غەدرەك دراستا سترانا فلكلۆری دا دهێتەكرن و شیرەتا من بۆ وان سترانبێژێن سەردەم هەیە دەمێ سترانا فلكلۆری دبێژن دەستكاریێ تێدا نەكەن دا كو تاما خوە ژدەست نەدەت.
هێشتاژی گۆت: د هونەری دا چ جوداهی دناڤبەرا رەگەزان دانینە، چونكو هونەر پەیامە و گەلەك جاران ل دیوانان من ستران ل گەل سترانبێژێن ژن ژی گۆتینە وەكو سترانبێژا وەغەكری هەلالا بەرچی و گەلەكێن دی مینا وێ .
