بەشار ئەسەد سەرەدانا عومانێ دکەت
ئەڤرۆ
پشتی پتر ژ ١١ سالان بۆ جارا ئێکێ بەشار ئەسەدێ سەرۆکێ سووریێ سەرەدانا وەلاتێ عومانێ کر و ل گەل سولتان هەیسەم بن تارق سولتانێ عومانی کۆمبوو و د کۆمبوونێ دا بەحسێ رەوشا ناڤخوەیی یا سووریێ هاتە کرن، سولتانێ عومانی پشتەڤانیا خوە بۆ شامێ دیار کر و هێڤی خواست، کو شەرێ نها ل سووریێ ب دووماهی بهێت.
وەزارەتا دەرڤە یا عومانێ د داخۆیانیەکێ دا دیار کریە، کو د هەڤدیتنێ دا سولتانێ عومانێ ژ بەر بیڤەلەرزا ڤێ دووماهیێ ل باکورێ سووریێ هەڤخەمیا خوە بۆ گەلێ سووریێ دیار کریە و راگەهاندینە عومان یا بەرهەڤە هاریکاریا سووریێ بکەت.
چاڤدێرێن سیاسی ژی دیار دکەن سەرەدانا بەشاری بۆ عومانی د راستی دا پەیامەکە بۆ هەموو ئالیان کو رەوشا سووریێ ئارام بوویە، بەشاری دڤێت نیشا هەموو جیهانێ بدەت کو ئەو سەرۆکێ سووریێ یە و پێگەهێ وی بهێزە.
