راپرسیێن نها د بەرژەوەندیا ئەردۆغانی دا نینن
ئەڤرۆ
سەرجان مەحمود:
پشتی ئۆپۆزسیۆنا تورکیا شیا کەمال کلچدار ئوغلۆی وەکو بەربژارێ خۆ بۆ هەلبژارتنێن سەرۆکاتیا تورکیا ئێکلا بکەت، د مەیدانا سیاسی یا تورکیا دا گه‌نگه‌شه‌کێ نوی ده‌ستپێکریه و گه‌له‌ک ئالیێن سیاسی و سازیێن جڤاکێ سڤیل راگه‌هاندن، هه‌که کلچدار ئوغلۆ دیموکراسیێ، مافێن مرۆڤی، پرۆژێن باشکرنا ره‌وشا ئابووری و چارەسەر‌کرنا پرسا کوردی بکه‌تە پشکەک ژ بەرنامێ خۆ دێ پشته‌ڤانیا وی که‌ن. هه‌روه‌سا ئاشکرا ژی دکه‌ن، کو دڤێت کلچدار ئوغلۆ به‌رێ تورکیا بده‌ته ئورۆپا و د‌ستووره‌کێ نوی د چارچۆڤێ قانوونێن ئێکەتیا ئورۆپا دا بۆ تورکیا دروست بکه‌ت.
ل ئالیێ دی چەندین کۆمپانیێن راپرسیان ژی ئەنجامێ دویماهیک راپرسیێن خۆ بۆ رایا گشتی ئاشکرا کرن، کو دیار دبیت ل گۆر راپرسیان هەکە نها ل تورکیا هەلبژارتنێن سەرۆکاتیێ برێڤە بچن کەمال کلچدار ئوغلۆ دێ بیتە سەرۆک کۆمارێ تورکیا، چونکی ژ بەر رەوشا خراب یا ئابووریێ نها وەلاتیێن تورکیا پشتەڤانیێ ل ئەردۆغانی ناکەن.
