رۆسیا: پشتەڤانیێ ل رێککەفتنا ئیرانێ و سعوودیێ دکەین
ئەڤرۆ
سەرجان مەحمود:
جێگرێ وەزیرێ دەرڤە یێ رۆسیا راگەهاند، رێککەفتنا ئیرانێ و سعوودیێ د بەرژەوەندیا هەموو دەڤەرێ دایە، وەکو رۆسیا وان رۆلەک بەرچاڤ بۆ رێککەفتنا ئیرانێ و سعوودیێ گێراینە و بەردەوام ژی دێ پشتەڤانیێ ل هندێ کەن دا رەوشا رۆژهەلاتا ناڤین یا ئارام بیت.
میخائیل بۆگدانۆڤ ئەو یەک ژی دیار کر، ئەمریکا بەردەوام دڤێت رەوشا رۆژهەلاتا ناڤین یا ئالۆز بیت، چونکی ئالۆزیێن ل رۆژهەلاتا ناڤین د بەرژوەندیا ئەمریکا دانە، لێ رۆسیا هەردەم کار بۆ ئارامیێ ل رۆژهەلاتا ناڤین دکەت، نها ئیران و سعوودیێ بریار داینە دەست ب قۆناغەکا نوی بکەن، ئەو یەک دێ کاریگەریەکا خۆ یا گەلەک باش بۆ هەموو دەڤەرێ هەبیت، رۆسیا بەری نها کار بۆ ئاساییکرنا پەیوەندیێن ئیرانێ و سعوودیێ کریە، چونکی دەمێ پەیوەندیێن دو وەلاتان ل دەڤەرێ ئالۆز بیت، ئالۆزی دێ کاریگەریا خۆ ل هەموو دەڤەرێ کەن، ئالۆزی د بەرژوەندیا چو ئالیەکێ دا نینن، بەلکو ئەمریکا دڤێت مفای ژ ئالۆزیان وەربگریت، ژ بەر هندێ ژی وەکو رۆسیا ئەم رێککەفتنا ئیرانێ و سعوودیێ گەلەک باش دبینین و دێ پشتەڤانیێ ل باشترکرنا پەیوەندیێن هەر دو وەلاتان ژی کەین.
ناڤهاتی د دووماهیا ئاخڤتنا خۆ دا ئەو یەک ژی دیار کر، نها ئەم کار دکەین دا تورکیا و سووریێ ژی دەست ب قۆناغەکا نوی بکەن، وەکو رۆسیا دەمەکە ئەم کار دکەین دا ئەنقەرە و شام ژی پەیوەندیێن خۆ ئاسایی بکەن، هەتا نها کارەک باش بۆ هندێ هاتیە کرن، مە دڤێت د زویترین دەم دا تورکیا و سووریێ ژی وەکو ئیران و سعوودیێ بریارەکا گرنگ و دیرۆکی بدەن، چونکی رێککەفتنێن وەسا گەلەک گرنگ و دیرۆکی نە و دێ بنە ئەگەرێ گوهۆڕینێن مەزن ل دەڤەرێ.
