60% خەلکێ تورکیا داخوازا گوهۆڕینا سیستەمێ نها دکەن
ئەڤرۆ
کۆمپانیێن راپرسیان ئەنجامێ راپرسیێن خۆ بۆ رایا گشتی ئاشکرا دکەن و ل گۆر ئەنجامێن راپرسیان هەکە نها ل تورکیا هەلبژارتن بهێتە کرن دێ ئاکپارتی هەر پارتا ئێکێ بیت لێ رێژا دەنگێن وێ دێ گەلەک کێم بن، چونکی 60% ژ خەلکێ تورکیا داخوازا گوهۆڕینا سیستەمێ سیاسی دکەن.
محەمەد پۆستەکی رێڤەبەرێ گشتی یێ کۆمپانیا ORC یا راپرسیان راگەهاند، هەلبژارتنێن ڤێجارێ وەکو چو هەلبژارتنێن بیست سالێن بۆری نابن، چونکی رێژەکا باش یا دەنگدەرێن نوو ل تورکیا هەنە، پڕانیا دەنگدەرێن نوو ژی داخوازا گوهۆڕینا سیستەمێ سیاسی یێ تورکیا دکەن، چونکی دەنگدەرێن نوو وەسا دبین سیستەمێ نها یێ سیاسی نابیتە بەرسڤ بۆ داخوازیێن وان و گۆت: (ل گۆر دووماهیک راپرسیا، کو ژ ئالیێ کۆمپانیا مە ڤە هاتیە کرن، دیار دبیت د رەوشا نها دا 60% ژ دەنگدەرێن تورکیا داخوازا گوهۆڕینا سیستەمێ سیاسی یێ تورکیا دکەن و رێژەکا مەزن ژ وان ژی دێ دەنگێ خۆ دەنە کەمال کلچدار ئوغلۆی و ژ بەر هندێ ژی نها شانسێ ئەردۆغانی گەلەک کێمە و هەکە رەوش وەسا بیت ڤێجارێ ئەردۆغان نابیتە سەرۆک کۆمارێ تورکیا).
ناڤهاتی ئەو یەک ژی دیار کر، ڤێجارێ کورد ژی وەکو هەلبژارتنێن بۆری پشتەڤانیێ ل ئەردۆغانی ناکەن، دو فاکتەرێن دی یێن گرنگ هەنە و بووینە ئەگەرێ هندێ دەنگێن ئاکپارتیێ گەلەک کێم ببن، یا ئێکێ قەیرانا ئابووری یە، چونکی نها رەوشا ئابووری یا تورکیا گەلەک خرابە و خالا دویێ ژی هەڤپەیمانیا ئاکپارتیێ ل گەل پارتا بزاڤا نەتەوەپەرست و پارتەکا دی یا ب ناڤێ هوداپار وەسا کریە گەلەک ژ دەنگەرێن ئاکپارتیێ خۆ ژ وێ پارتیێ دوور بکەن.
ل ئالیێ دی کۆمپانیێن راپرسیێن یێن وەکو گەزیجی، پییار، کۆندا، ئانار و چەندین کۆمپانیێن دی ژی ئەنجامێن راپرسیێن خۆ بۆ رایا گشتی ئاشکرا کرن و دیار کرن، پڕانیا خەلکێ تورکیا داخوازا گوهۆڕینا سیستەمێ سیاسی یێ تورکیا دکەن، چونکی خەلک وەسا دبینن سیستەمێ نها نەشێت قەیرانێن هەی چارەسەر بکەت، د ناڤ سیستەمی دا گەندەلیەکا مەزن هەیە و دڤێت ئێدی سیستەمێ نها بهێتە گوهۆڕین، خەلک وەسا دبینن سیستەمێ سەرۆکاتیێ بوویە ئاستەنگ ل هەمبەر ئازادیا راگەهاندنێ و گەشەپێدانا دیموکراسیێ و دڤێت جارەکا دی سیستەمێ تورکیا ببیتە سیستەمێ پەرلەمانی، ژ بەر هندێ ژی رێژەکا گەلەک زێدە ژ دەنگدەران ناخوازن ڤێجارێ ئەردۆغان ببیتە سەرۆک کۆمارێ تورکیا، چونکی خەلک داخوازا گوهۆڕینا سیستەمێ سیاسی دکەن و دبێژن پێدڤیا تورکیا ب سیستەمێ پەرلەمانی هەیە، دڤێت تورکیا خۆ پتر نێزیکی ئۆرۆپا بکەت، چونکی پەیوەندیێن حوکمەتا نها ل گەل رۆسیا ژی ب دلێ خەلکی نینن، ژ بەر ڤان خالان و گەلەک خالێن دی ڤێجارێ 60% ژ خەلکێ تورکیا داخوازا گوهۆڕینا سیستەمێ سیاسی و نەمانا دەستهەلاتا نها یا تورکیا دکەن.
