چین و بەرازیل پەیوەندیێن خۆ بهێز دکەن و ئەمریکا یا دلگرانە
ئەڤرۆ
سەرۆک کۆمارێ بەرازیلێ بۆ سەرەدانەکا پێنج رۆژی گەهشتە چینێ و ل گەل بەرپرسێن وی وەلاتی کۆمبوو، سەرۆکێ بەرازیلێ راگەهاند وان دڤێت پەیوەندیێن خۆ یێن ئابووری و سیاسی ل گەل چینێ بهێزتر لێ بکەن و هەروەسا وان دڤێت چین ب رۆلێ خۆ رابیت دا شەرێ نها ل ئۆکرانیایێ ژی بهێتە راگرتن.
لولا داسیلڤا سەرۆکێ بەرازیلێ ئەو یەک ژی دیار کر، نها پەیوەندیێن ئابووری یێن د ناڤبەرا وەلاتێ وی و چینێ دا گەلەک د باشن و بەرازیلێ دڤێت د بیاڤێ سیاسی دا ژی پەیوەندیێن خۆ ل گەل چینێ باشتر لێ بکەت. ژ بەر هندێ ژی وی ل گەل شاندەکێ مەزن کو ژ ٢٠٠ کەسێن بسپۆر پێک دهێت سەرەدانا چینێ کرینە و ئەو یەک ژی نیشا ددەت بەرازیلێ دڤێت د هەموو بیاڤەکێ دا پەیوەندیێن خۆ ل گەل چینێ بهێز بکەت.
چاڤدێرێن سیاسی ژی دیار دکەن، نها رۆسیا ل ئالیەکێ و ل ئالیێ دی ژی بەرازیل و هندەک وەلاتێن دی یێن رۆژهەلاتا ناڤین پەیوەندیێن خۆ ل گەل چینێ بهێزتر دکەن و ئەو یەک ژی بوویە جهێ دلگرانیا ئەمریکا، چونکی چینێ دڤێت جهێ ئەمریکا ل گەلەک دەڤەران بگریت و نها هەڤڕکیەکا گەلەک مەزن د ناڤبەرا چینێ و ئەمریکا دا هەیە.
