ئەژین قادر: گرنگ نینە هژمارا كەنالان زێدە ببیت یا گرنگ ئەوە ناڤەڕۆك پێش بكەڤیت
ئەڤرۆ
سالار محەمەد دۆسكی:
ئەژین قادر، بێژەرا دەنگوباسێن سیاسی ل كەنالێ زاگرۆس یێ عەرەبی، د دیدارەكێ دا بۆ رۆژناما ئەڤرۆ دیاركر كو بەری هەڤدە سالان ئەو هاتیە دناڤ بۆارێ راگەهاندنێ دا و ئەڤە دو سالن ل كەنالێ زاگرۆس كاردكەت.
ئەژینێ گۆت: دڤان هەڤدە سالان دا من ل گەل كەنالێن كوردی كاركریە، لێ نوكە ل زاگرۆس تیڤی كارێ من بێژەرا دەنگوباسێن سیاسی، هەروەسا بەرنامێ (صباح الخیر كوردستان) ە، كو ب زمانێ عەرەبی یە، بەری نوكە ژی ل گەل بەرنامێن هونەری و ئابووری و سیاسی و جڤاكی من كاركریە و هەتا رادەكی شیایمە ل گەل هەر بەرنامەكی خوە بگونجینم و ب دیتنا من پێشكێشكار دڤێت وەك (چۆكەری) بیت، لێ ل گەل هندێ كارێ راگەهاندنێ نە یێ ب ساناهی یە و هەموو كەس نەشێن ئەنجام بدەت، بۆ زانین ئەز ب حەزا دایكا خوە هاتیمە دناڤ راگەهاندنێ دا، لێ شانازیێ ب كارێ خوە دبەم و ل هەڤدە سالێن بۆری گەلەك تشتێن خۆش و نەخۆش ب سەرێ مە هاتینە، لێ دڤێت خوە ل گەل بگونجینین و بەردەوام گوهۆڕینان بكەین و هیڤیا من ئەوە راگەهاندنا كوردی رۆژ بۆ رۆژێ پتر پێشكەڤیت و گرنگ نینە هژمارا كەنال و كارمەندان زێدە ببیت، بەلكو یا گرنگ ئەوە ناڤەرۆك پێش بكەڤیت.
