زەحمەتە جارەکا دی ئەردۆغان ببیتە سەرۆک کۆمارێ تورکیا

ب، سه‌رجان مەحمود:

کۆڤارەکا بریتانی دیار دکەت، نها رەوشا ئابووری یا تورکیا گەلەک خرابە، پەیوەندیێن تورکیا ل گەل وەلاتێن ئێکەتیا ئۆرۆپا باش نینن و هەروەسا بێکاری و رەوشا خراب یا ژیانێ ژی وەسا کریە ڤێجارێ خەلک دەنگێ خوە نەدەنە ئەردۆغانی، هەروەسا پڕانیا وەلاتێن رۆژئاڤایی ژی ڤێجارێ حەز دکەن کەمال کلچدار ئۆغلو ببیتە سەرۆک کۆمارێ تورکیا.

کۆڤارا حەفتیانە یا دێ ئیکۆنۆمیست یا بریتانی راپۆرته‌ک سەبارەت ب هه‌لبژارتنێن تورکیا بەلاڤ کریە و د راپۆرتێ دا هاتیە دیار کرن، نها ره‌وشا تورکیا د وارێن ئابووری، سیاسی، په‌یوه‌ندیێن ده‌رڤه‌ و دیموکراسیێ دا گەلەک خرابە، وەلاتیێن تورکیا ژی ئەردۆغانی وەکو بەرپرسیارێ ئێکێ یێ رەوشا نها یا خراب ل تورکیا دبینن، هەروەسا نها رەوشا ئابووری یا تورکیا گەلەک خرابە، پەیوەندیێن تورکیا ل گەل وەلاتێن ئێکەتیا ئۆرۆپا ژی د چەند سالێن دووماهیێ دا گەلەک خرابن، نها هەر بەحسێ ئەندامەتیا تورکیا د ناڤ رێزێن ئێکەتیا ئۆرۆپا دا ناهێتە کرن، پڕانیا وەلاتیێن تورکیا ژی وەسا دبینن، کو ئەردۆغانی ب سیاسەتا خوە یا شاش تورکیا ژ ئۆرۆپا دوور کریە.

هەمان کۆڤارێ ئەو یەک ژی دیار کریە، نها پڕانیا وەلاتیێن تورکیا ڤێ پرسیارێ ژ خوە دکەن، هه‌که‌ ئه‌ردۆغان د هه‌لبژارتنێن ٤ێ گۆلانێ دا سه‌رکه‌ڤیت دێ ره‌وشا تورکیا د هه‌ر واری دا خرابتر بیت. لێ هه‌که‌ که‌مال کلچدار ئۆغلو د هه‌لبژارتنان دا سه‌رکه‌ڤیت دێ په‌یوه‌ندیێن تورکیا ل گەل ئێکەتیا ئۆرۆپا و ئه‌مریکا باشتر بن، هەروەسا د وارێ دیموکراسیێ دا گاڤێن مه‌زن دێ هێنه‌ هاڤێتن و بۆ ڤێ چه‌ندێ ئالیێن دیموکرات یێن جیهانێ ژێ حەز دکەن د رەوشا نها دا  که‌مال کلچدار ئۆغلو ببیتە سەرۆک کۆمارێ تورکیا، چونکی د چەندین سالێن بۆری دا تورکیا خوە ژ ئۆرۆپا و جیهانا دیموکرات دوور کریە، تورکیا پتر ژ هەر دەمەکێ بەرێ خوە دایە رۆسیا و ئەو یەک ژی بوویە ئەگەرێ هندێ پڕانیا وەلاتێن رۆژئاڤایی خوە ژ ئەردۆغانی و دەستهەلاتا وی  دوور بکەن.

کۆڤارا ناڤهاتی هه‌روه‌سا راگه‌هاندیە رێژا بێکاریێ گه‌له‌ک زێده‌ بوویه‌، بهایێ پێدڤیاتێن سەرەکی یێن ژیانا رۆژانە ژی گه‌له‌ک گران بووینه‌ و ئه‌و شیانا خه‌لکێ نه‌مایه‌ پێدڤیێن خوه‌ یێن رۆژانە دابین بکەن، هه‌روه‌سا ئه‌ردۆغان هه‌موو که‌س و ئالیێن ئۆپۆزسیۆنێ ل تورکیا وه‌ک تیرۆرست تۆمه‌تبار دکه‌ت و ئه‌و یه‌ک وه‌سا دکه‌ت، کو ل هه‌مبه‌ر ئه‌ردۆغانی ده‌نگێ که‌سێن نه‌رازی بلندتر ببیت. زۆرداریه‌کا مه‌زن یا ده‌ستهه‌لاتێ ل هه‌مبه‌ر خه‌لکی هه‌یه‌ و وه‌سا خوه‌یا دکه‌ت، کو وه‌لاتیێن تورکیا دخوازن ڤه‌گه‌رنە ڤە سیسته‌مێ په‌رله‌مانی، چونکی د چەند سالێن دووماهیێ دا دیار بوو، سیستەمێ سەرۆکاتیێ د بەرژەوەندیا وەلاتیێن تورکیا دا نینە.

کۆڤارا بریتانی د دووماهیا راپۆرتا خوه‌ دا ژی به‌حسێ ئۆپۆزسیۆنێ و به‌ربژارێ سه‌رۆک کۆماریێ ئانکۆ که‌مال کلچدار ئۆغلوی دکه‌ت و ئاشکرا دکه‌ت، کو کلچدار ئۆغلو که‌سەک دیموکراته‌ و هه‌که‌ سه‌رکه‌ڤیت دێ په‌یوه‌ندیێن خوه‌ ل گەل ئۆرۆپا و وەلاتیێن رۆژئاڤا باشتر که‌ت و دێ به‌رێ خوه‌ ده‌ته‌ ئۆرۆپا، ژ به‌ر ڤێ یه‌کێ پرانیا وه‌لاتێن ئۆرۆپا و یێن دیموکرات دخوازن که‌مال کلچدار ئٶغلو ببیته‌ سه‌رۆک کۆمارێ نوو یێ تورکیا.

کۆمێنتا تە