سەعید كەسێ ئێكێ بوو دكانا شەربەتێ ل دهۆكێ ڤەكری
ئەڤرۆ
شاكر ئەتروشی:
خودێ ژێ رازی (سەعید عەمەر محەمەد) بەرنیاس ب (سەعید شەربەت) كەسێ ئێكێ بوو ل پارێزگەها دهۆكێ دوكانەكا فرۆتنا شەربەتێ ڤەكری، ل دەستپێكێ شەربەتا مێویژا ل مالا خوە چێدكر و دئینا دوكانێ دفرۆت، پشتی بەرفرەهبوونا كارێ وی ئێدی شەربەت ل دوكانی چێكر و هەتا نوكە ئەو دوكانا مایە.
بەیار سەعید، كوڕێ دویێ یێ سەعید شەربەتی بۆ رۆژناما ئەڤرۆ گۆت: بابێ ل سالا 1932 ل گوندێ بەربهار ژ دایكبوو، پشتی سێ سالان هاتنە دهۆكێ و ل سالا 1979 كەسێ ئێكێ بوو دوكانەكا شەربەتا مێۆیژا ل دهۆكێ ڤەكری كو هەتا نوكە ژی ل سەنتەرێ باژێری مایە و دكەڤیتە بەرامبەر پاركا نەورۆز، بابێ من شەربەت ل مالا چێدكر و دبرە دوكانێ دفرۆت و خەلكێ دهۆكێ یێ وی سەردەمی هەر زوو حەز ژ شەربەتا وی دكرن و هەر زوو بەرنیاس بوو هەتا گەهشتیە وی رادەی كو خەلكەك دەمێ ژ مووسل و بەغدا ژی دهاتن ئەو شەربەت ب سەتلا دكڕین و بۆ مالێ خوە دبرن، پشتی بابێ مە چوویە بەردلۆڤانیا خودێ ئەم نەشیاین بەردەوامیێ پێ بدەین، چنكو ئەم بتنێ دو برا بووین و دایكا مە ئەو نازدار كربووین، لێ هەتا نوكە ژی دەمێ ئەز و بۆایێ خوە یێ مەزن (سالار) دچینە جهەكی و دبێژینێ ئەم كوڕێن سەعید شەربەتی نە گەلەك رێزێ ل مە دگرن و ئەڤە مەزنترین شانازیە بۆمە.
