پێدڤیە سەرۆک کۆمارێ نوو یێ تورکیا دەست ب گوهۆڕینان بکەت
ئەڤرۆ
دوهی هەلبژارتنێن گەڕا دویێ یا سەرۆک کۆماریێ ل تورکیا هاتنە کرن و چاڤدێرێن سیاسی ژی دیار دکەن، دڤێت سەرۆک کۆمارێ نوو یێ تورکیا دەست ب گوهۆڕینێن بنگەهین بکەت، بەری هەر تشتەکێ هەتا پرسا کوردی ل تورکیا نەهێتە چارەسەرکرن دێ ئالۆزیێن نها ل تورکیا ژی بەردەوام بن.
ئەحمەد هاکان نڤیسەر و چاڤدێرێ سیاسی ل تورکیا راگەهاند، رێژەیا پشکداریا وەلاتیان د گەڕا دویێ یا هەلبژارتنان دا کێمتر بوو، ئەو یەک ژی نیشا ددەت وەلاتیێن تورکیا ژ رەوشا نها رازی نینن، ژ بەر هندێ ژی پێدڤیە سەرۆک کۆمارێ نوو یێ تورکیا دەست ب گوهۆڕینێن بنگەهین ل تورکیا بکەت، سەرکەفتنا ئەردۆغانی یان ژی کلچدار ئۆغلۆیی رامانا هندێ نادەت چو پرس ل تورکیا نینن، بەلکو نها تورکیا د قەیرانەکا گەلەک مەزن دایە، دڤێت سەرۆک کۆمارێ نوو یێ تورکیا بەری هەر تشتەکێ بزاڤا هندێ بکەت، قەیرانا ئابووری چارەسەر بکەت، خالا دی یا گەلەک گرنگ ژی بێگومان پرسا کوردی یە، نها پرسا کوردی ئێکە ژ پرسێن سەرەکی ل تورکیا، دڤێت پشتی هەلبژارتنان سەرۆک کۆمارێ نوو یێ تورکیا ب رەنگەکێ جددی کار بۆ چارەسەرکرنا پرسا کوردی بکەت و گۆت: (بەحسێ دستوورەکێ نوو بۆ تورکیا دهێتە کرن، بێگومان ئەو یەک تشتەک گەلەک باشە و هێڤیدارم تنێ ژ بۆ پرۆپگاندا هەلبژارتنان نەبیت، دڤێت پشتی هەلبژارتنان دەستهەلاتا نوو یا تورکیا ب رەنگەکێ جددی کار بۆ چارەسەرکرنا پرسا کوردی بکەت، چونکی هەتا پرسا کوردی ل تورکیا دوور ژ شەری نەهێتە چارەسەرکرن ئالۆزیێن نها ژی دێ بەردەوام بن).
تان ئۆرال نڤیسەرێ تورکیا ژی راگەهاند، د هەلبژارتنێن پەرلەمانی دا ئاکپارتیێ پرانیا کورسیکان ل دەڤەرێن کوردی بدەستڤەئینان، ئەو یەک ژی نیشا ددەت کوردان باوەری ب ئاکپارتیێ هەیە، ئەو هێڤیدارن ئاکپارتی دەست ب قۆناغەکا نوو بکەت، چونکی شەڕێ هەتا نها زیانەکا گەلەک مەزن گەهاندیە کوردان، هەروەسا وەلاتیێن تورکیا ژی دخوازن ئێدی شەڕ ب دووماهی بهێت، ژ بەر هندێ ژی گەلەک گرنگە دەستهەلاتا نوو یا تورکیا د بەرنامێ خوە دا گرنگیەکا گەلەک مەزن بدەتە کوردان و پرسا کوردی ژی چارەسەر بکەت.
ل گۆر باوەریا چاڤدێرێن سیاسی هەرچەندە شانسێ ئەردۆغانی گەلەک زێدەیە کو ببیتە سەرۆک کۆمارێ تورکیا، لێ ئەردۆغان ژی نەشێت د ٥ سالێن بهێت دا وەکو ٥ سالێن بۆری کار بکەت، چونکی دڤێت گوهۆڕینێن بنگەهین ل تورکیا بهێنە کرن، نە تنێ کورد بەلکو پرانیا وەلاتیێن تورکیا داخوازا گوهۆڕینان دکەن.
ل ئالیێ دی دەزگەهێن راگەهاندنا تورکیا ژی دیار دکەن، گەڕا دویێ یا هەلبژارتنێن سەرۆک کۆماریێ ل تورکیا وەکو گەڕا ئێکێ نەبوو، رێژەیا پشکداریێ کێمتر بوو، ئەو یەک ژی نیشا ددەت قەیرانا ئابووری کاریگەریا خوە ل رێژەیا پشکداریا وەلاتیان یا کری.
