رۆلێ كچێ د كارێن هونەری دا یێ كێمە
زنار تۆڤی:
سەمرا وەیسی، دەرچوویا پشكا مۆزیكێ یە ل پەیمانگەها هونەرێن جوان ل دهۆكێ، د دیدارەكێ دا بۆ رۆژناما ئەڤرۆ دیاركر، وێ گەلەك حەز ل سەر هونەری و گۆتنا سترانان هەبوو، لەوما چوو وێ پشكێ و بەری ئەو بچیتە پەیمانگەها هونەرێن جوان وێ ستران دگۆتن و خێزانا وێ ژی پشتەڤان بوون، هەروەسا ل ڤیستەڤالا 26 یا پەیمانگەها هونەرێن جوان وێ پشكداری د گۆتنا هەشت سترانان دا كریە ب شێوەیێ كۆرس، بەلێ هەتا نوكە وێ چ ستران تۆمار نەكرینە.
ناڤهاتیێ گۆت: نوكە ئەز سترانان دبێژم، بەلێ وەكو تۆماركرنا سترانان و چێكرنا كلیپان و خۆ دیار كرن دناڤ سۆشیال میدیایێ دا، هێشتا من هزر د هندێ دا نەكریە، هەر چەندە ئەز بەردەوام سترانان دبێژم و حەزژ دەنگێ هونەرمەند محەمەد تاها ئاكرەیی و كاروان كامل دكەم، هەروەسا نوكە ب رەنگەكێ باش پشتەڤانی ل كچان دهێتە كرن، كو د هەموو بیاڤێن هونەری دا كاربكەن و خۆ دناڤ هونەری دا ببینن و ئەڤە ژی گاڤەكا باشە، سەرەرایی پشتەڤانیەكا باش بۆ كچان هاتیە كرن، بەلێ هێشتا رۆلێ كچێ د بیاڤێ هونەری دا ل هەرێما كوردستانێ یێ كێمە و د ئاستێ پێدڤی دا نینە.
