هیڤیا من ئەوە پەیكەرێن ئەز دروست دكەم ل جهێن گشتی یێن دهۆكێ بهێنە دانان
ئەڤرۆ، زنار تۆڤی:
ژینخاز شوكری، شێوەكارەكا گەنجە، بۆ رۆژناما ئەڤرۆ دبێژیت: هەلبژارتنا من بۆ پشكا هونەرێ شێوەكاری و پشكا پەیكەرسازیێ ئەو بوویە، كو هەر ژ زارۆكاتیا خوە دا من بەهرەیەك هەبوو، كو ئەز پەیكەران دروست بكەم، ل گەل هندێ ئەز دیزاینێن جلكان ژی چێدكەم، لەوما من دڤیا ئەز ل ڤێ پشكێ بخوینم و نوكە ئەز كارێ شێوەكاریێ و پەیكەرسازیێ دكەم.
ناڤهاتیێ گۆت ژی: كارێ پەیكەرسازیێ ل دهۆكێ د ئاستەكێ گەلەك كێم دایە و جڤاكێ مە ژی بهایی نادەنە ڤی هونەری، ب تنێ ئەڤ هونەری لدەف هونەرمەندێن پەیكەرساز گرنگی و بهایێ خوە هەیە، هەروەسا دڤێت خەلكێ مە ژی چاڤێن مە هونەرمەندان هەبن، بەلێ مخابن خەلكێ مە چاڤێ هونەرمەندان نینن وەكو مە پەیكەری ببینن، دیسان گەلەك یا ب زەحمەتە ل كوردستانێ مرۆڤ بشێت دەبارا ژیانا خوە ب هونەری بكەت.
ژینخاز هێشتا دبێژیت: ئەز پەیكەران ژ داری و بەران ژی دروست دكەم، بۆ من چێكرنا پەیكەرێن داری خۆشترە ژ یێن بەری، هەتا نوكە من هزر ل هندێ نەكریە، كو ئەو كارێن ئەز دروست دكەم بفرۆشم، چونكی خەلكێ مە پەیكەرێن خۆمالی ناكرن، پتر یێن بیانی دكرن، هەروەسا هەتا رادەكێ ژی پەیكەر ل جهێن گشتی ل دهۆكێ هاتینە دانان، ئەز حەز دكەم كو ئەو پەیكەرێن ئەز چێدكەم ل هندەك جهان ل دهۆكێ بهێنە دانان، ئەڤ چەندە دێ خۆشییەكا تایبەت لدەف من پەیدا كەت.
