پارێزگەرێ دهۆكێ: دخوازم سترانبێژێن ڤی سەردەمی ل دووڤ رێباز و شۆپا هونەرمەند (تەحسین تاهای) بچن
مەحمود نهێلی:
سالڤەگەڕا هونەرمەندێ مەزن (تەحسین تاهای) ب چاڤدێرێ و بەرهەڤبوونا بەرێز د. عەلی تەتەر پارێزگەرێ دهۆكێ و بەڕەڤان حەمدی بەرپرسێ لقێ هەژدە یێ پارتی و وارشین سەلمان قائیمقامێ قەزا ئامێدیێ و مالبات و چەند هەڤال و دوستێن هونەرمەندێ خودێ ژێ رازی، ل رۆژا پێنجشەمبا بۆری رێكەفتی 8/6/2023 ل ئامێدیێ هاتە ساخكرن و ل دەستپێكێ ل دەروازێ سیلاڤێ پەردە ل سەر پەیكەرێ وی هاتە لادان كو ژلایێ پەیكەرساز ئەرشەد خەلەف ڤە هاتبوو چێكرن.
د دووڤدا ل هولا پەروەردێ چەند گۆتار و چالاكی هاتنە پێشكێشكرن و پارێزگەرێ دهۆكێ د پەیڤەكێ دا گۆت: ئەم سەربلندین كو مە هونەرمەندەكێ كورد پەروەر وەكو تەحسین تاهای هەی و دخوازم هونەرمەند و سترانبێژێن ڤی سەردەمی ل دووف رێباز و شۆپا وی بچن، پشتی خواندنا پەیڤێن سەندیكا هونەرمەندان و مالباتا وی و نیشادانا فلمەكێ دكیۆمەنتاری ل دۆر ژیان و بەرهەمێن وی چەند سترانەكێن وی ژلایێ تیپا كۆرالا پەیمانگەها داسنیا هاتنە گۆتن و خەلات ل سەر پشكدار و مالبات وچەند هەڤال و دوستێن وی هاتنە بەلاڤكرن.
