فلمەكێ كوردی دو خەلات ل رووسیا وەرگرتن
ئەڤرۆ، زنار تۆڤی:
فلمێ ئەلیف ئانا، یێ دەرهێنەرێ كورد كازم ئۆز و سەمیر ئاسلانیۆرەك، د گەرا 32 ێ یا فلمە فیستەڤالا نێڤدەولەتی یا شۆڤالیەیا زێرین ل گرۆزنیا ل رووسیا، دو خەلات وەرگرتن، ئەو ژی خەلاتێ تایبەت یێ ژووریێ و خەلاتێ تایبەت یێ رێكخستنا وێ فیستەڤالێ بوویە.
دەرهێنەرێ كورد كازم ئۆز، بۆ رۆژناما ئەڤرۆ دیار كر: ئەم گەلەك دلخوەشین ب وەرگرتنا وان هەر دو خەلاتان ل فلمە فیستەڤالا شۆڤلییەیا زێرین، هەروەسا فیستەڤالا نێڤدەولەتی یا فلمێن شۆڤالیەیا زێرین، هەر سال ل باژێرەكێ جۆدا ل رووسیا دهێتە گێران، دناڤا 20 فلمێن جیهانی دا، هەڤركیەكا ب هێز بۆ ب دەستڤەئینانا خەلاتێن ژوورییێ دا هەبوو، فلمێ ئەلیف ئانا شیا خەلاتێ ژوورییێ یێ تایبەت وەرگریت، ل گەل خەلاتێ رێكخستنا وێ فیستەڤالێ.
ناڤهاتی گۆت ژی: فلمێ ئەلیف ئانا، ل سالا 2022 ێ هاتیە چێكرن، ئەڤ فلمە بەحسێ چیرۆكەكا راست یا ئەلیفێ دكەت، كو دایكا پیرۆزا ئاناتۆلیایێ یە، كو ب شەهرەزایا خوە دهێتە نیاسین، ل سەر بهایێن ئەڤینی، ئاشتی، وەكهەڤی، پارڤەكرنێ و تۆلەرانس و دل ئێشییێ، هژمارەكا ئەكتەرێن خودان شییان یێن تورك و باكوورێ كوردستانێ پشكداری تێدا كریە، ئەڤ فلمە، فلمەكێ كوردییە ل سەر هندەك ژ ژیانا كوردێن عەلەوی ل باكوورێ كوردستانێ هاتیە چێكرن و شیایە ناڤودەنگیەكا باش ل سەر ئاستێ وەلاتێ توركی ب دەست خوەڤە بینیت.
