پەیكەرەكێ نوو بۆ هونەرمەند (حەسەن زیرەك)ی هاتە دروستكرن
هونەرمەندێ كوردێ پەیكەرساز (بەشیر ناسری) پشتی ب دووماهی ئینانا زنجیرەكا پەیكەرێن كەسێن مەزن د ناڤ ئەدەب و رۆمان و هەلبەستا كوردی دا، نوكە دووماهی ب دروستكرنا پەیكەرێ هونەرمەندێ ناڤدارێ كورد (حەسەن زیرەك)ی ئینایە كو بریارە ل دەمەكێ نێزك ل فێرگەهەكا هونەری بوكان بهێتە دانان.
ئەڤ پەیكەرە ب هاریكاریا فێرگەها مۆزیكا دیلان هاتیە دروستكرن، پشتی دانانا زنجیرەكا پەیكەرا بۆ كەسایەتیێن ئەدەبی و رەوشەنبیرێن كورد وەكو (عەبدوللا پەشێو، شێركۆ بێكەس، بەختیار عەلی، جەلادەت بەدرخان، قالە مەرە).
بەشیر ناسری دیار كر كو دووماهی كارێ وی د بوارێ پەیكەرسازیێ دا دروستكرنا پەیكەرێ هونەرمەندێ ناڤدارێ كورد (حەسەن زیرەك)ی بوو كو بوویە سمبولا جوانیێ د ناڤ هونەرێ كوردی دا ل رۆژهەلاتا ناڤەڕاست كو د درێژاهیا ژییێ خوە یێ هونەری دا شیایە ب ئاواز و دەنگێ خوە یێ رەسەن خزمەتەكا مەزن پێشكێشی هونەرێ كوردی بكەت و هەتا ئەڤرۆ ژی هونەرێ وی ب زیندی مایە و بۆ كوردستان24 گۆت: «وەكو وەفاداریەك بۆ خزمەت و ماندوبوونا ڤی هونەرمەندی من ئەڤ پەیكەرە دروستكر، كەرەستێن گەلەك باش بۆ دروستكرنا ڤی پەیكەری هاتینە بكارئینان و وەرزەكی تمام د بوریت هەتا كو ئەز پەیكەرەكی ب دووماهی بینم ژ بەر كو من دڤێت هەمی دەما كارەكێ جوان یێ هونەری ب كوالێتیەكا باش پێشكێش بكەم».
