زەینەب یاش: ژ بەر كارێ من سال و نیڤا ئەز هاتمە دوورخستن
شاكر ئەتروشی:
زەینەب یاش، ڤەگولەر و ئەرشیف پارێز، د دیدارەكێ دا بۆ رۆژناما ئەڤرۆ گۆت: نوكە ئەز بەرپرسا پشكا ڤەكولین و ئەرشیفی مە ل مۆزەخانا باژێرێ ئامەدێ مە، بۆ كارێ خوە ئەز بەردەوام دهێمە دهۆكێ، ب تایبەت ژی ئنستیۆتا كەلەپۆرێ كوردی، كو ئەز ئێك ژ دامەزرێنەرێن وێ بووم، ل دووماهی سەرەدان ژی بەری حەفتیەكێ بوو ئەز هاتمە دهۆك چۆمە ناڤەندا خانی یا رەوشەنیری و راگەهاندنێ و ئێكەتیا نڤیسەرێن كورد و كەنالێ وار و هندەك جهێن دی، مە پەیوەندیێن باش ل گەل وان هەنە و ئەو پشتەڤانێن كارێ منن، هەروەسا ڤێ جارێ ئەز چۆمە مالا هونەرمەندێ فۆلكلۆری (عابد دهۆكی) كو ب راستی خزینەكا فۆلكلۆری د مالا خوە دا پاراستیە و ب پارەی ناهێتە كڕین، ئەو ژی گەلەك هاریكاریا من كر و ئەرشیفێ خوە كو ب سەدان قاون و بە كرە بوون دانانە بەر دەستێ مە من مفایەكێ باش ژێ دیت و پشتی ڤەدگەڕینە ئامەدێ دێ ڤەكولینێ ل سەر ژێدەرێن هندەكان كەین و هەموو پێكڤە دێ هێنە پاراستن و مەرەما مە ژڤی كاری ئەوە دا ئەرشیفێ خوە ژ مرنێ و بەرزەبوونێ رزگاربكەین، چنكو گەلەك ژوی ئەرشیفی كو یێ ستران و مۆزیكا مە كوردی یە ل وەلاتێ توركیا ل بەر گەڤێن نەمانێ یە، لەورا پێدڤیە ئەم هەموو خوە لێ بكەینە خودان و ب پارێزین.
هەروەسا گۆت: ژبەر كارێ من گەلەك ئاستەنگ بۆ من چێبۆینە ژوان جارەكێ ئەز سال و نیڤا ژ كاری دوورخستم، لێ ئەز دێ هەر یا بەردەوامم و دێ بەرخودانێ كەم، بۆ زانین من ب هزاران قاوەن و ئاكا و بەكەرێن ستران و مۆزیكا كوردی پاراستینە و ئەڤ كارە هەموو نە بەس ب خۆبەخش بەلكو هندەك جاران پارێ مالا خوە ژی بریە و چو كەس و لایەنان پشتەڤانی ل من نەكریە بتنێ هەڤژینێ من (هۆزان) پشتەڤانێ منە و گەلەك جاران دبێژیتە من تە پارێ مە و زارۆكێن مە هەموو دا ب فولكلۆرێ كوردی.
