بسپۆرەکێ ناڤدار یێ تورکیا هۆشداریێ ددەتە ئەردۆغانی
بسپۆرەکێ ئابووریێ دیار دکەت، رەوشا ئابووری رۆژ ب رۆژێ خرابتر لێ دهێت و مخابن هەتا نها وەکو پێدڤی دەولەتێ کار نەکریە، هەکە رەوش وەکو نها بەردەوام بیت دێ ئێک دۆلار گەهیتە ٣٠ لیرێن تورکیا و دێ گرانتر ژی لێ هێت، وی دەمی دێ رێژەیا هەژاریێ زێدەتر لێ هێت و ئەو یەک دێ بیتە ئەگەرێ روودانا ئالۆزیێن مەزن ل تورکیا.
پرۆفیسۆر ئۆزگوور دەمیرتاش بسپۆرێ ئابووری ل تورکیا بۆ دەزگەهێن راگەهاندنا وی وەلاتی ئاخڤی و دیار کر، رەوشا ئابووری یا تورکیا گەلەک خرابە، نها دۆلار رۆژ ب رۆژێ گران دبیت، د دەمەکێ نێزیکی دا ئێک دۆلارێ ئەمریکی دێ بیتە ٣٠ لیرێن تورکیا و دێ گرانتر ژی لێ هێت، چونکی مخابن هەتا نها دەولەتێ چو پرۆژە بۆ گەشەپێدانا ئابووری و راگرتنا گرانبوونا بهایێ دۆلاری نینن، ئەو یەک ژی دێ رێ بۆ هندێ خوەش کەت دا دۆلار گرانتر ببیت، بێگومان د رەوشەکا وەسا دا رەوش دێ گەلەک خراب بیت و گۆت: (نها رێژەیا هەژاریێ ل تورکیا رۆژ ب رۆژێ زێدەتر دبیت، رێژەکا بەرچاڤ ژ خەلکی نەشێن پێدڤیاتیێن سەرەکی یێن ژیانا رۆژانە بۆ خوە دابین بکەن، بەردەوامیا رەوشا نها دێ بیتە ئەگەرێ روودانا کارەساتێن مەزن ل تورکیا، دڤێت دەولەت بلەز دەست ب هندەک گوهۆڕینێن بنگەهین بکەت).
ناڤهاتی هۆشداری ژی دا دەستهەلاتێ و دیار کر، دەستهەلاتا نها هەموو گرانیا خوە دایە سەر روودانێن سیاسی، داهاتەکێ گەلەک زێدە یێ تورکیا بۆ کاروبارێن سەربازی دهێتە تەرخان کرن، بێگومان ژ بەر هندێ ژی گەشەپێدانا ئابووری هاتیە راگرتن، دڤێت نها کار بۆ پرۆژێن مەزن بهێتە کرن، دڤێت رێژا بێکاریێ ل تورکیا بهێتە کێمکرن، ئەرکێ سەرەکی یێ حوکمەتا نها دڤێت ئەو بیت کا دێ چاوا شێت رێگریێ ل هەژاریێ بکەت، مخابن رەوشا نها باش نینە و گرانبوونا بەردەوام یا دۆلارێ ئەمریکی ژی کاریگەریا خوە ل سەر ژیانا رۆژانە یا وەلاتیان کریە.
ئەو یەک د دەمەکێ دایە کو بەری نها ژی گەلەک ژ بسپۆرێن سیاسی، کەسێن ئەکادیمی و مامۆستایێن زانکۆیێ د داخۆیانیێن جودا جودا دا ئاماژە ب هندێ کرینە، رەوشا نها یا تورکیا گەلەک خرابە، ئەمریکا و وەلاتێن ئێکەتیا ئۆرۆپا شەڕەکێ مەزن یێ ئابووری ل دژی تورکیا راگەهاندینە و دڤێت دەولەت ژی دەست ب پرۆژێن مەزن بۆ گەشەپێدانا ئابووری بکەت، لێ مخابن هەتا نها چو پرۆژێن مەزن یێن دەستهەلاتێ بۆ چارەسەریا قەیرانا ئابووری نینن و دەولەتێ هەموو هێزا خوە بۆ دەستێوەردان د کاروبارێن هندەک وەلاتان ب تایبەتی ژی وەلاتەکێ وەکو سووریێ تەرخان کریە و ژ بلی زیانێ ژی چو مفایەکا خوە بۆ تورکیا نەبوویە، ژ بەر هندێ ژی دڤێت دەستهەلاتا نها پێداچوونێ ستراتیژیا خوە یا ئابووری دا بکەت.
