پارتیا باباجانی ئێرشی جەهەپێ دکەت
ئدریس شاهین پەیڤدارێ پارتیا (دەڤا) یا ب سەرۆکاتیا عەلی باباجانی راگەهاند، مخابن بەرپرسێن جەهەپێ د هەلبژارتنان دا وەکو پێدڤی کار نەکرن، هەروەسا هندەک ژ پارتیێن دی یێن هەڤپەیمان ل گەل جەهەپێ ژی هاریکاریا ئاکپارتیێ کرن و ژ بەر هندێ ژی د هەلبژارتنان دا وان نەشیان دەنگێن پێدڤی بدەستڤە بینن و گۆت: (براستی ژی دڤێت پارتیا کۆماری دەست ب هندەک گوهۆرینان بکەت، بەرپرسێن نها یێن جەهەپێ نەشێن چو گوهۆرینان بکەن و ئەو یەک ژی دێ بیتە ئەگەر ئاکپارتی هەردەم د هەلبژارتنان دا یا سەرکەفتی بیت).
ناڤهاتی راگەهاند نها ١٥ کورسیێن وان ل پەرلەمانێ تورکیا هەنە، لێ ئەوێ یەکێ چو مفایا خوە نینە، چونکی نها پڕانیا پەرلەمانی د دەستێ ئاکپارتیێ و هەڤپەیمانێن وێ دایە و ئەو وەکو ئۆپۆزسیۆن نەشێن ب رێیا پەرلەمانێ تورکیا چو گوهۆرینان بکەن و ئەو یەک ژی ب هەموو رەنگەکێ د بەرژەوەندیا دەستهەلاتێ دایە.
