خەلكێ مە حەز ژ سترانێن خەمگین ناكەت
هەرهین محەمەد:
سترانبێژ (یوسف محەمەد) د دیدارەكێ دا بۆ رۆژناما ئەڤرۆ گۆت: ئەز بەردەوام دچمە دەواتان و سترانێن فۆلكلۆری دبێژم و بۆ من سترانگۆتن یا خۆشە و هەست ب وەستیانێ ناكەم، بەلێ دسەر هندێ را رەخنە ل من دهێتە گرتن و ئەز ل گەل رەخنێ مە، چونكو ئەو كەسێ رەخنە لێ نەهێتە گرتن ئەو كەسە ئاڤا نابیت و نەشێت نوویاتییان بكەت، بەلێ رەخنەیا دجهێ خودابیت و سوپاس بۆ خودێ رەخنێ وەل من نەكریە دلێ من ژ سترانگۆتنێ رەش بیت.
ناڤهاتی گۆت: گەلەك كەس دبێژنە من دەنگێ تە و سترانبێژ دیار حەسەن نێزیكی ئێكە و تشتەكێ نۆرمالە هەكە سترانا ل گەل وی بێژم و هەتا نوكە من ئەو نە دیتیە و و دێ خوشحالبم هەكە وی بینم و د بەرنامێ من دایە بەرهەمەكێ جوان یێ فۆلكلۆری یێ داوەت و شەهیانان چێكەم و خەلكێ مە ژی حەزژ سترانێن سڤك دكەت و حەزژ سترانێن خەمگین ناكەن.
