هەتا نوكە پتری (800) ئافرەتان فێری شووفێریێ كرینە
شاكر ئەتروشی:
نیدار مستەفا بەرواری، راهێنەر ل نڤیسینگەها دهۆك یا فێركرنا شۆفێریێ، د دیدارەكێ دا بۆ رۆژناما ئەڤرۆ دیاركر كو دژیەكێ بچووكدا وێ حەز ژ هاژۆتنا ترۆمبێلێ دكر، لەورا چۆ وێ نڤیسینگەها نوكە لێ كاردكەت و پشكداری دخۆلەكا فێركرنێ دا كر و هەتا دوێ سالێ دا ل مەها هەشت وەك راهێنەر ل وێ نڤیسنگەهێ دەست ب كاربوو، و ب گۆتنا وێ هەر ئافرەتەكا دهێتە دەف وێ ئەو ناڤێ وێ دنڤیست و تا دووماهیا هەیڤا بۆری (800) ئافرەت فێری هاژۆتنا ترۆمبێلێ كرینە و پتریا وان مۆلەتا شۆفێریێ وەرگرتینە.
نیدارێ گۆت: هەر ئافرەتەكا دهێت دماوێ دەه رۆژان دا ئەز فێری هاژۆتنا ترۆمبێلی دكەم، بەس كچ زووتر ژ ژنان فێری هاژۆتنا ترۆمبێلێ دبن، چنكو مێشكێ وێ ڤەكری ترە، بەس یێ ژنێ هەموو دەما هزرا وێ یا ل سەر زارۆیێن وێ، یان ئاریشێن مالێ، بۆ زانین ئەم گۆژمێ (150) هزار دیناران ژ هەر كەسەكێ وەردگرین و هەبووینە مە كێمتر ژی ژێ وەرگرتیە، بۆ زانین هەكە كچێ یان ژنێ باوەری ب خوە هەبیت دێ جورئەتا هاژۆتنێ ل دەف پەیدا بیت و ل وی دەمی دێ زوو فێر بیت، چنكو هندەك هەبووینە بتنێ پێنج رۆژان هاتینە خۆلێ و فێربووینە و چووینە مۆلەتا هاژۆتنێ وەرگرتینە، بۆ زانین نوكە ئەم سێ كچ ل ڤێ نڤیسینگەها كاردكەین، ب سوپاسی و رێزڤە رێڤەبەریا هاتن و چوونێ دگەل كارگێریا نڤیسینگەهێ د گەل مە گەلەك دهاریكارن، لێ هندەك شۆفێر هەنە ل جادێ بۆمە نەخۆش دكەن.
