تیپەكا مۆزیكێ بۆ زارۆكێن دهۆكێ دێ هێتە چێكرن
شاكر ئەتروشی
رێڤەبەریا چالاكیێن قوتابخانەیان، سەر ب پەروەردا قەزا دهۆك/ رۆژهەلات ڤە، بەری (45) رۆژان خولەكا مۆزیكی بۆ پتر ژ پێنجی قوتابیێن قوناغا بنەرەت ڤەكر بوو، پشتی ب دووماهی ئینانا وێ خۆلێ نێزیكی بیست قوتابیان ژلایێ ماموستایێن وێ خۆلێ ڤە هاتنە ژێگرتن و نوكە یێ بەردەوامیێ ب پرۆڤێن خوە ددەن و رێڤەبەریا چالاكییان ل بەرە بكەتە گرۆپەكێ مۆزیكی كو ب ڤە بن و ل دەمێ بهێت ب نوونەراتیا پەروەردا گشتی ل پارێزگەها دهۆكێ پشكداری د ڤیستەڤال و ئاهەنگان دا بكەن.
نیوار حەجی حەسەن حەجی، رێڤەبەری چالاكیێن فوتابخانەیان سەر ب پەروەردا قەزا دهۆك/ رۆژهەلات ڤە، بۆ رۆژناما ئەڤرۆ گۆت: ئەو قوتابیێن پشكداری د خۆلێ دا كرین ب رەنگەكێ گشتی هەموو دباش بوون و هەموو قوتابیان مفا ژی وەرگرت، چنكو ماموستایێن خۆلێ د زیرەكن و بسپۆر بوون، لەورا هەر وان ماموستا ئەڤ قوتابیە ژێگرتن، چنكو بۆ وان دیاربوو هەكە بەردەوامیێ ب پرۆڤێن خوە بدەن ل پاشەرۆژێ دێ بنە مۆزیكژەنێن باش، لەورا نوكە ژی ئەو قوتابی دهێن و هیڤیا من ئەوە رێڤەبەریا گشتی یا چالاكیێن قوتابخانەیان، هەروەسا رێڤەبەریا گشتی یا پەروەردێ ل پارێزگەها دهۆكێ پتر پشتەڤانیا مە بكەن دا ئەم هەموو پێكڤە ڤێ تیپێ ب دامەزرینین ژبۆ هندێ كو ل فیستەڤال و چالاكیێن هونەری ببیتە نوونەرا پارێزگەها دهۆكێ.
