كەڤال هونەرەكێ بێ دەنگە
هەرهین محەمەد:
شێوەكار (دەریا نوری) د دیدارەكێ دا بۆ رۆژناما ئەڤرۆ دیاركر كو وێ ژ زارۆكینیا خوە حەزا هونەرێ شێوەكاری هەبوویە و مالا وێ هەموو هاریكارو پشتەڤانێن وێ بوون كو ب گەهیتە هیڤێن خوە و بچیتە پەیمانگەها هونەرێن جوان و ب شێوەكێ ئەكادیمی بخوینیت و كەڤالێن وێ ژی دەربڕینێ ژ سرۆشتی و مرۆڤان و خەیالێ دكەن و ژبەر ڤێ چەندێ ژی داخوازی ل سەر كەڤالێن وێ هەنە و دفرۆشیت.
هەروەسا گۆت: دكەڤالێن خوە دا گەلەك رەنگێ سپی تێكەلی رەنگێن دی دكەم، چونكو گەلەك جاران كەڤال رەنگان دخوازیت و ئەو چەندە ژی نە ب حەزا شێوەكاری یە، هەروەسا كەڤال هونەرەكێ بێ دەنگە و ناهێتە شرۆڤەكرن و هەركەسەكێ سەحكەتێ ئێكسەر ئەو ب خوە دزانیت بابەتێ كەڤالی ل سەرچیە، بەلێ ل كوردستانێ چ گرنگی نەدایە كەڤالێن خۆمالی و ئەڤە ژی دبیتە ئەگەر كو چ كەڤالێن مە ل جیهانێ دەنگ ڤە نەدەن.
