هونەرێ شێوەكاری بتنێ ناڤەك دایە من
هونەرمەندێ شێوەكار ئاراز نیرسیسیان د دیدارەكێ دا بۆ بەرپەرێ هونەری یێ رۆژناما ئەڤرۆ گۆت: ل كوردستانێ گەلەك یا ب زەحمەتە مرۆڤ مفای ژ هونەرێ شێوەكاری ببینیت بتنی مفایێ مەعنەوی نەبیت و ناڤەك بۆ مە دروستكریە و بەری چەند سالان بەرپرسێ چالاكیێن قوتابخانان بووم ل دهۆكێ ل وی دەمی مە چەند خولێن هاڤینی
ڤەكرن وەكو مۆزیك و شانۆ و شێوەكاری هەروەسا پێشانگەهێن شێوەكاری ل سەر ئاستێ قوتابخانان مە ڤە دكرن و هەڤركی یا كاری دناڤبەرا قوتابیان دا دهاتەكرن و كەلوپەلێن كاری ل سەر قوتابیان دهاتنە بەلاڤكرن و دبەرهەڤبوون كو بچنە پەیمانگەهێ بخوینن و بەردەوامیێ ب هونەرێ خوە بدەن و دیسان خول بۆ ماموستایان ژی دهاتنە ڤەكرن.
هەروەسا گۆت: مە هونەرمەندێن شێوەكار یێن ئەكادیمی و نەئەكادیمی هەنە و هەموو دەمان هونەرمەندێ شێوەكار بزاڤێ دكەت خوە پێش بێخیت و مە هندەك هەڤال هەنە ل سەر ئاستێ جیهانێ كەڤالێن وان هاتینە نیشادان و ناڤەكێ بلند و باش هەیە، بەلێ هێشتا راگەهاندنێ رۆلێ خوە نەدیتیە كو ئەوی هونەرمەندی پێش بێخیت و دیسان پێدڤیە حكومەت ژی گرنگیەكا زێدەتر ب هونەرمەندێن شێوەكار بدەت وەكو وەلاتێن بیانی ژ بەر كو وەلاتێن بیانی گرنگیێ ب
هونەر و هونەرمەندێن خوە ددەن و گەلەك هونەرمەندێن شێوەكارێن بیانی وەغەركریە، بەلێ وەلات و خەلكێ وان هێشتا گرنگیێ دەنە بەرهەمێن وان و نیشاندەن.
ل دووماهیێ گۆت: كەڤال زمانەكە و هەر كەسەكێ بەرێخودانێ بۆ بكەت وەكو خوە شرۆڤەدكەت و دگەهیتە ئەوی ئاستی یێ هونەرمەندی حەز و مەرەم بۆ هەی، یان ژ خودانێ كەڤالی پتر شرۆڤە بكەت ، چونكو هەر بینەرەكی دیتنەكا جودا بۆ كەڤالی هەیە.
