ئاهەنگا (52) سالیا دامەزرندنا خوە گێڕا
شاكر ئەتروشی:
ب هەلكەفتا بۆرینا (52) سالان ل سەر دامەزراندنا ئێكەتیا نڤیسەرێن كورد/لقێ دهۆك، ل ئێڤاریا رۆژا پێنجشەمبی رێكەفتی 10/8/2023 سێ سمینار ل هولا نڤیسەران هاتنە پێشكێششكرن.
د. رەشید فندی، د سمینارا ئێكێ دا بەحسێ چاوانیا دامەزراندنا لقێ دهۆك یێ ئێكەتیا نڤیسەرێن كورد كر و دیاركر كو هەلبەستڤان و نڤیسەرێ هێژا (شێخ مەمدۆحێ بریفكی) ئێكەم سەرۆكێ لقێ دهۆك یێ نڤیسەران بوو، ئەو ژی جێگرێ وی بوو، دخولا دویێ ژی دا بەرێز (د. رەشید) بوو سەرۆكێ لقێ دهۆك و نڤیسەرێ هێژا (ئەحمەد عەبدوللا زەرو) بوو جێگرێ سەرۆكێ لقێ دهۆك و هندەك ئەو بزاڤ و چالاكی دیاركرن یێن كو ل سەر دەمێ وان هاتینە ئەنجامدان و گۆت: دامەزراندنا لقێ دهۆك یێ ئێكەتیا نڤیسەران ئێك ژ دەستكەفتێن شۆرەشێ بوو كو رێكەفتن ل سەر هاتیە كرن.
د دووڤدا نڤیسەرێ دێرین (ئەحمەد عەبدوللا زەرو) كو بۆ ماوێ چارخولان ل دووف ئێك ئەو سەرۆكێ لقێ دهۆك یێ ئێكەتیا نڤیسەران بوو بەحسێ وان بزاڤ و چالاكییان كر یێن كو ل سەر دەمی وی هاتینە كرن و هەبوونا ئێكەتیا نڤیسەران ب گرنگیەكا مێژووی ل قەلەمدا.
ل دووماهیێ (د. عارف حیتۆ) سمینارەك ل بن ناڤێ محسن قۆچان دناڤبەرا هەلبەستێ و رۆمانێ دا پێشكێشر، ل دووماهیێ ژی ل ناڤ باغچێ نڤیسەران هندەك تەزباتی ب وێ هەلكەفتنێ هاتنە بەلاڤكرن.
