دخوازین كەنالێن كوردی سترانێن مە بەلاڤ بكەن
زنار تۆڤی:
سترانبێژ (ئەدیب گۆزەگەر) كو خەلكێ باژێرێ بدلیسێ یە ل باكوورێ كوردستانێ، ئەڤە بیست و دو سالن ل باژێرێ ئەنقەرە دژیت، د دیدارەكێ دا بۆ رۆژناما ئەڤرۆ دبێژیت: نوكە مژوولی تۆماركرنا سترانەكا نوومە ب ناڤێ( تایا ئەڤینێ) ژ پەیڤ و ئاوازێن منن، ل نێزیك دێ كلیپكەم، كو دێ بیتە كلیپا من یا پێنجێ، هەروەسا چەند سترانێن دی ل بەر دەستێ منن بەلێ ژبەر رەوشا ئابووری نوكە نەشێم تۆماربكەم.
ناڤهاتی گۆت: ل سەر كەنالێ زانا تیڤی ب رێیا یوتیۆبی، ل رۆژێن پێنجشەمبی، ئەز بەرنامەكێ هونەری ب ناڤێ (ئەڤین و هونەر) ب رەنگەكێ زیندی پێشكێش دكەم، بۆ زانین ل سالا 2015 من دەست ب گۆتنا سترانان كریە، بەلێ ژلایێ دەولەتا توركیا ڤە، گەلەك سانسۆر ل سەر ستران و مۆزیكا كوردی هەیە و چەندین جاران ژبەر گۆتنا سترانێن شۆڕەشگێری ئەز هاتیمە گرتن، هەروەسا ل باكوورێ كوردستانێ هەموو كەنال و دەزگەهێن راگەهاندنێ یێن كوردی هاتینە گرتن، لەوما ئەم نەشێین سترانێن خوە ل چو تیڤی و كەنالان بەلاڤ بكەین، لەوما دخوازین كەنالێن كوردی ل هەرێما كوردستانێ ستران و بەرهەمێن مە بەلاڤ بكەن و پشتەڤانییێ ل مە بكەن.
