را گەهاندنا كوردی ل دەڤەرا بەهدینان د بازنەكێ ڤالا دا دزڤڕیت
هەرهین محەمەد:
نسرەت حاجی، بەرپرسێ مالپەرێ (سوباهی پۆم كۆم) د دیدارەكێ دا بۆ رۆژناما ئەڤرۆ گۆت: مالپەرێ مە تایبەتمەندییا خوە هەیە و خواندەڤانێن مە ژی د تایبەتن، چونكو گرنگیێ نادەینە نوچەیێن بلەز، بتنێ گرنگیێ د دەینە ئەوان نووچەیان یێن روو ددەن و دووفچوونا وان ب هووری دكەین و خەتا مە ژی نەتەوەیی كوردستانی یە، ئەم د هەموو بواران دا سەربەخوەینە رەخنێ و گازدان دكەین و گەندەلیێ شەرمزار دكەین، بەلێ ژ خەتا نەتەوەیی و كوردستانی دەرناكەڤین.
هەروەسا گۆت: هەتا نوكە مە ل دەڤەرا بەهدینان راگەهاندنەكا پرۆفیشنال نینە كو بیتە زمانحالێ دەڤەرێ و د بازنەیەكێ ڤالا دا دزڤڕیت، دراگەهاندن و مەدیایێ دا كێماسی هەنە و نە مەرجە مرۆڤی ئامیرە و ستودیۆ و تەكنەلۆژیەكا پێشكەفتی هەبیت و یا گرنگ دناڤ مەدیایێ و راگەهاندنێ دا ناڤەرۆكە و ئەو ناڤەرۆكا دهێتە دەست نیشانكرن ژبۆ ستراتیژیەت و دیدگەه و ئارمانجا ئەوێ چییە و نەمەرجە نوچەیەكی بەلاڤ كەی و گەلەك لایك و كومێنتان ب دەست خوە ڤە بینی و دبیت ئەو نووچەیە شاش دەركەڤیت و دبینم لەزایەتی نە مەرجە و ناڤەرۆك مەرجە و پشتی نووچەیێ بلەز بەلاڤ دبیت باوەری نامینت و هەر دەمێ بینەران باوەری ب كەنالەكێ راگەهاندنێ نەما ئەو كەنالە لاواز دبیت.
