هندەك زەلامان كارێ خوە كریە هەڤالینیا ئافرەتان
هەرهین محەمەد:
د ژیانا هەڤژینیێ دا ژن و زەلام تەمامكەرێن ئێكدونە د خۆشی و نەخوشیان دا ل گەل ئێكن دا كو ژیانەكا بەختەوەر ببورینن لدور بابەتی ڤەكولەرەكا جڤاكی گۆت: دڤێت ژن و زەلام ڤالاهیێن ئێكدو پر بكەن ب ئاختنێن خوش و برنا دیاریان بۆ ئێكدو، دا كو هەست بتنێ بوونێ نەكەن و خیانەت دروست نەبیت.
ڤەكولەرا جڤاكی مونا عەبدولمەجید یاسین دیار كر، دو ئەگەر هەنە ژنا ب هەڤژین ئەڤینداری زەلامەكێ دی بیت ژبلی هەڤژینێ خۆ ئەگەرێ ئێكێ زەلام بخۆیە دەمێ گرنگیێ ب هەڤژینا خۆ نەدەت، یان دەمێ زەلامی پەیوەندی ل گەل ژنێن دی هەبن ل وی دەمی ژن ژی دێ بزاڤێن تولڤەكرنێ كەت، ئەگەرێ دوێ ئەوە هندەك كەس هەنە خودان گیانەكێ لاوازن و گۆت: (ئەگەرێ ژ هەموویان مەزنتر و كارتێكرنەكا زور ل سەر پەیوەندیێن هەڤژینان هەی تەكنەلوژیایە بتایبەت هەكە هەڤژین زور دەمێ خو بدەنێ).
مونایێ زێدەتر گۆت: (هندەك زەلاما كارێ خوە كریە هەڤالینیا ئافرەتا و د شارەزانە د وی بواری دا، ب دو سێ پەیڤان ژنان سەردا دبەن، ئارمانجا وی ئەوە پارا ژێ چێكەتن یان بۆ حەزێن خوە یێن تایبەت بكار بینیت و ژن ژی مەرەما وی نزانیت و هەر زوی دكەڤیتە داڤێن ئەڤینیێ و خەلەتیان، ئێدی زەلام دی داخوازیا كەت ئەڤجا چ پارا بخوازیت یان داخوازا كریارا سكسی بكەت و هەكە ژن بو بجه نەئینیت دێ گەڤان لێ دكەت، لەورا ژن نەچار دبیت خو ب دەستڤە بەردەت یان دبیت پارا ددەتێ داكو ژیانا وێ یا هەڤژینیێ خراب نەبیت).
ڤەكۆلەرا جڤاكی ئەو چەندە ژی گۆت: (پێدڤیە زەلام گرنگیێ بدەتە هەڤژینا خوە و ئەو ڤالاهیێن د ژیانا ژنێ دا پر بكەت ب ئاخفتنێن خوش و دیاریا و گەریانان دا كو ژن هەست بتنێبوونێ نەكەت، ژبەركو هەكە ژنێ هەست ب تنێبوونێ كر دێ وان ڤالاهیێن ل دەڤ هەی پر كەت و ب رێكێن خەلەت).
ڤەكۆلەرا جڤاكی مونایێ د بەردەوامیا ئاخفتنێن خودا گۆت: (ژن یا هەستیارە و زوی كارتێكرن لێ دبیت و گەلەك جاران ژنێ مالا خوە یا خراب كری و خوە دایە بەردان ژبەر خوشتڤیێ خوە یێ نوی، لێ پشتی بەردانێ ئەوی كەسی بخوە ئەو ژنە نەخواستیە، چونكی بتنێ مەرەما وی ئەو بوویە خوشیەكێ ژێ ببینت و چارەسەریا ئەڤێ چەندێ ژی ئەوە ژن و زەلام ڤالاهیێن ئێكدو پر بكەن دا كو نەكەڤنە چو خەلەتیان).
