ژبەر جڤاكی ئەم شەرم دكەین هەموو كاران بكەین
بێوار حەمدی
سەرۆكێ ئێكەتیا كرێكاران تایێ دهۆكێ دیار كر، ژ بەر كو دەلیڤێن كاری دكێمن، ژبەر هندێ خودان كاران مەرجێن كاركرنێ ب زەحمەت كرینە. گەنجەك ژی دبێژیت: چەوا مە هەموو كار نەڤێن، بەروڤاژی هەمی كاران ژی ئەم نەڤێین، هەروەسا ئەم شەرم ژی دكەین ژ بەر جڤاكی هەموو كاران بكەین.
وەلات ئەمین، سەروكێ ئێكەتیا سەندیكا كرێكاران تایێ دهۆك د دیدارەكێ دا بۆ رۆژناما ئەڤرۆ گۆت: ب شێوەیەكێ گشتی كار گەلەك كێم بویە، ژبەر چێبوونا چەندین روودانێن جیهانی كارتێكرنەكا مەزن ل مەبوو وەكو دەستەیا كرێكاریێ، ب مخابنی ڤە ئەو كارێ هەی ژی د ئاستێ پێدڤی دانینە و ئەو كریا كرێكار وەردگریت تێرا رۆژانێن ژیانا وی ناكەت، ژ بەر كو داهات یێ كێمە و ئێدی گەنجێ مە ژی زەوقێ كاركرنێ نەمایە، ئەز دبینم گەنجێ مە حەز ژ كاری دكەت، بەلێ كار نە ل ئاستێ پێتڤی یە.
سەروكێ سەندیكایێ گۆت ژی: ئەم وەكو سەندیكا كرێكارا نە د بەرپرسین ژ پەیداكرنا دەلیڤێن كاری، بەلكو ئەڤە كارێ حوكمەتێ یە، ژ بەر كو كارێ سەندیكایێ ئەوە بەرگریێ ژ ماف و بەرژەوەندیێن كرێكاری بكەت، بەلێ جاران ئەم ب تنێ هندەك پێشنیاران ژ بۆ حوكمەتا هەرێمێ دكەین ژ بۆ باشكرن و بەرفرەهكرنا دەلیڤێن كاری.
ناڤبری ئەو چەندە ژی دا زانین، دەلیڤێن كاری دكێمن، ژ بەر هندێ خودانێن كاران ژی مەرجێن كاركرنێ ب زەحمەت كرینە، ژ بۆ وێ مەرەمێ كو پتر مفای ژ هێز و شیانێن ڤی كرێكاری ببینن و گۆت: دڤێت گەنجێ مە ژی ئیرادەیەكا ب هێز هەبیت بۆ دەستپێكرنێ و كاركرنێ و بەردەوام ل كاری بگەریێت، هەتا بلا ب كرێیەكا كێم ژی رازی بیت، چونكی ئەڤرۆ باشترە ژ سوباهی.
هاریكار عەبدوللا، گەنجەكێ باژێرێ دهۆكێ یە دەربارەی كاری گۆت: ئەز وەكو گەنجەك ژلایێ خۆڤە یێ بەرهەڤ نینم هەمی كارا بكەم، چونكی یا وەل مە هاتی ئەم شەرم ژ خوە دكەین ژبەر جڤاكی، ژ بەر كو ئەم یێ دناڤ جڤاكەكی دا نەشێین هەمی كارا بكەین و ئەز ب خوە ژی ئەگەر كارەكێ ب زەحمەت و گران بیت گەلەك دشێم دوو رۆژان ب قەتینم، زێدەباری هندێ كاچەوا مە هەمی كار نەڤێن و پێ رازی نابین، بەروڤاژی هەمی كار ژی ب مە رازی نابن.
هاریكاری دیاركر ژی، بێگومان دەلیڤێن كاری بۆ كچان زێدەترن بەرامبەر كوری، ئەڤە د دەمەكی دایە كچێ ل بازاری كارنەدكر، بەلێ نوكە هەر مۆلەك یان ماركێتەكا مەزن بهێتە ڤەكرن خودان كار هێدی هێدی پێكوڵا دكەن كچان بدەنە كاری و گۆت: ب شێوەیەكێ گشتی چ كچ بیت یان كور ئەز دبینم گەنجێن مە حەز ژ كاركرنێ دكەن و وان دڤێت كاربكەن خۆ ئەگەر ب زەحمەت ژی بیت، بەلێ ب مخابنی ڤە د نوكە دا كار ب تەمامی نەمایە.
چاڵاكڤان هوزان ئیسماعیل دەربارەی بابەتی گۆت: ئەز نابینم پتر دەلیڤەیێن كاری بۆ كچان هەبن، بەلێ دەمێ دبینین كچەك ل مولەكێ كاربكەت یان كارەكێ بازرگانی بكەت، ئەڤە دچاڤێن جڤاكی دا تشتەكێ جیاوازە و بەری نوكە نەهاتیە دیتن، یا پێدڤی یە كچ ل بەر وان جها كاربكەت یێن گرێدای كەل و پەلێن ئافرەتان، ل ڤێرێ كچ ژی دشێت پتر تشتان ژ هەمان رەگەزێ خو بكڕیت.
هوزانێ دیاركر ژی، گەنجێن مە هەتا راددەیەكی و ب تایبەت ل تەمەنەكێ دەستنیشانكری ب هەمی كارا رازی نابن و ب تایبەتی جیلێ نوی، چونكی هندی دیتی ب خوشی و تەنای ژیایە و یێ ب جوانی و نازداریا خۆ ڤە مژوول بووی، لەوما نەشیایە داهاتەكی بۆ خۆ و ماڵباتا خۆ ب خۆها ئەنیا خۆ پەیدابكەت و گۆت: گەنجێ مە هندەك كارا ب شەرم ناڤ دكەت، بەلێ ب دیتنا من چ شەرم د كاركرنێ دا نینە و شانازیە مروڤ كاربكەت و داهاتەكی پەیدابكەت.
رەیان موحەمەد، وەكو گەنجەك دەربارەی بابەتێ كاركرنێ دیاركر، گەنجێن مە ئەوێن خودان هزرێن بازرگانیی و پڕۆژەیێن بچووك هەین د هەر بوارەكی دا، یا ل سەر حوكمەتێ پێدڤی یە هاریكاریا وان بكەت دا كو ببنە خودان پرۆژە و ب ڕێكا وان پرۆژان دەلیڤێن كاری ژی زێدەبن و گۆت: (ئەو كارێن مە هەین ژی مەرجێن وان یێن كاركرنێ گەلەك ب زەحمەتن و ب تایبەت ژ بۆ رەگەزێ نێر، ئەڤجا دڤێت سنورەك بۆ ڤێ چەندێ بهێتە دانان).
رەیانی ئەو چەندە ژی ئاشكرا كر، گەلەك كار ژی هەنە گەنجێن مە خۆ ژێ ددەنە پاش، ئەڤە ژی بۆ چەند ئەگەرەكان دزڤریت، گەلتەك یا ب ژانە دەما گەنجەك بی و خودان باوەرنامەیەكا زانستی یا باش بی و پشتی چەندین سالێن سەختێن خواندنێ چو دەلیڤێن كاری و دامەزراندنێ ژی نەبن، دەما مروڤ خودان باوەرنامەیا ماستەرێ بیت ل وی دەمی نە یێ نەچارە بلوكا بكێشیت یان ل خوارنگەهەكێ ل سەر پێن خۆ ئامانا بشوت و 10 هزار دینار كریا وی یا ڕوژانە بن.
ل دووماهیێ ژی دیار كر، چارەسەریا ڤێ چەندێ هەموویێ ژی ئەوە دڤێت گرنگی ب هێز و شیانێن گەنجێن مە بهێتە دان و گەلەك مەرجێن دژوار ل سەر وان نەهێنە سەپاندن و بارێ وان نەهێتە گرانكرن و ب چاڤێ خزمەتكارا بەرێ خوبدەنێ، چونكی كەس ب خێرا خۆ چ كاران ناكەت.
