سوباهی 35 سال دێ ل سەر كۆمكوژیا گوندێ كورێمێ دەربازبن
دیدار، سالار محەمەد دۆسكی:
هەوا ئەنفالان ل دەڤەرا بەهدینان كو ب قوناغا هەشتێ دهێتە نیاسین ژ رێكەفتی 25/8/1988 هەتا 6/9/1988 بەردەوام بوو، گوندێ كورێمێ ژوان گوندا بوویە كەفتیە بەر شالاوا ئانفالان و كومكوژی تێدا هاتیە روودان و نوكە مونومێنتەك ل گوندی هاتیە دروستكرن، پێ شمەرگێ شورەشا گولانێ و شەهیدێ زندی عەبدولكەریم نائیف حەسەن كورێمەی، ژدایك بوویێ سالا 1967ێ یە ئێك ژ رزگاربوویێن هەوا ئەنفالێن دەڤەرا (بەهدینان)ە 28/8/1988 ل گوندێ (كورێمێ) سەر ب ناحیا مانگێشكێ ڤە، دڤێ دیدارا رۆژنامەڤانی دا شەهیدێ زندی دیار دكەت كو نوكە ژیێ وی (35) سالە و خوە دهژمێریت ل سالا 1988 ژ دایك بوویە.
شەهیدێ زندی، كەریم كورێمەی ل سالا 1986ێ دبیتە پێشمەرگە ل رێكخراوا (دم دم) سەر ب لژنا ناوچا دهۆك ڤە وی دەمی ئامر مەفرەزە (رەشید كورێمەی) یێ بەرنیاس ب بابێ( تەیوو) بوو، ناڤبری نوكە بابێ پێنچ زارۆكان بناڤێ (نەژبیر، ئومێد، ئەلند، بلند، هەژین)د دیدارەكا رۆژنامەڤانی دا ل گەل رۆژناما ئەڤرۆ، كەریم كورێمەی گۆت: پشتی راوستاندنا شەرێ دناڤبەرا عیراق و ئیرانێ دا ل سالا (1988) قوناغا هەشتێ یا هەوا ئەنفالان ل دەڤەرا بەهدینان دەست پێكر، وی دەمی پێشمەرگە بووم سەر ب لژنا ناوچا دهۆك ڤە و گوندێ مە (كورێمێ) ل دەڤەرا دۆسكیا ئێك ژوان گۆندان بوو كەفتیە بەر شالاوا ئەنفالان، مە هزر نەدكر دێ كارەسات ب وی رەنگی بیت وەكی چێبووی، لێ هاتە ئاشكەراكر كو هەر جهێ بەرگێریێ بكەت دێ رژێم ب توندی بەرسفێ دەت، خەلكێ گوندی وی دەمی (40) خێزانا پێك دهات مە بزافكرن بەرەف گوندێ (هەمزا) بچین و بەرەف توركیا ل رێكێ دا خەلكێ گوندێ (چەلكا سەیدا) ژی نێزیكی (12) خێزانا بوون ئاكنجیێن گوندێ (هەمزا) بوون كەفتنە ل گەل مە دا و پشتی بزاڤێن مە سەرنەگرتین نەچاربووین ل گەل هەر (12) خێزانێن (چەلكا سەیدا) ڤەگەرینە گوندێ( كورێمێ) و پشتی دەربازبوونا شەڤەكێ سپێدێ رابووین دەردورێن گوندی ژلایێ لەشكەرێ عیراقێ ڤە دورپێچ كرینە، پشتی مە دانوستاندن دناڤبەرا خوە دا كرین سێ كەسایەتیێن گوندی هاتنە دەست نیشانكرن بۆ دانوستاندنێ ل گەل لەشكەرێ عیراقێ پێك هاتبوون ژ بابێ من(نائیف، خەلیل بابێ قهار، حەجی ئەنوەر) پاتێ سپی ئێخستنە دارا و بەرەف لەشكەرێ عیراقێ چوون دا رەمی ل وان نەهێتەكرن و پشتی دەمژمێرەكێ ئەو كەسایەتیێن گۆندی ڤەگەریان و دیاركر كو لەشكەرێ عیراقێ دیاركر كو لێبورینەك شفێدی هاتیە راگەهاندن و سەر بەختێ (قورئانێ و صەدام و حزبا بەعس) بلا خوە رادەست بكەن و دێ ب سلامەت بن، مە گۆت: مە باوەری ب قورئانێ هەیە وەك كورد و موسلمان و نەچارین خوە رادەستی قورئانێ بكەین و ئەڤە نەچاربوو، (33) زەلام ژبلی ژن و زارۆكان ل زەڤیەكا گوندی هاتینە كومكرن و دەست ب ڤاڤارتنێ كر و كچ و ژن و كەسانێن دانعەمر و زارۆك هاتنە جوداكرن و زەلام مان (33) زەلام دژیێ (14 هەتا 50) سالیێ مان ژڤێ هەژمارێ (22) خەلكێ گوندێ (كوریمێ) بوو (11) خەلكێ گوندێ(چەلكا سەیدا) بوون، خێزان و زارۆك و دانعەمر دانە بەرا خوە و بەرەف مانگێشكێ برن و هەمی ئافرەتا ل قێریا دان و گۆتن بێی زەلامێن خوە ناچین ئەوا گۆتێ هەرن دێ ل گەل ئاخڤین و دێ ئەو ژی گەهنە هەوە، پشتی ئەم ژ چەك هاتینەكرن ، ب دووراتیا (250) مەتران بەرەف باشورێ گوندی برین و كرینە ئێك رێز، مە هزرا كوشتنێ نەكر چونكە مە دگۆت ئەم دیلین د دەستی دا و سەر بەختێ خودێ و قورئانێ مە خوە رادەست كریە، ئێكسەر گۆت راوستن سەر چوكا و دووڤ دا رەمی ل مەهاتەكرن و مە ئاگەه هەبوو هەتا (20) لەشكەرا رەمی ل مەكر و هەر كەسەك وەك خوە كەفت و قێرین و نالین و شەهدە دان و هەواركرنا خودێ و بزاڤا قورتالبوونێ كر، ئەز نیڤەكا رێزێ دابووم و پصمامێ بابێ من (عەبدوالرحمان حسێن) كەفتە سەر كەلەخێ من و (صەلاح و خالد) هەر دو برایێن ئێك بوون ئەو ژی كەفتنە سەر كەلەخێ من و مامە لبن سێ كەلاخا ڤە و ئەوا سێ ساجور گوهورین و دوماهیێ فەرمان هاتەدان هەر ئێكێ گولەكێ لێ بدەن و ڤێرا هات و گەهشتە من و پصتال ب سەر پێ من بوو و گولەك ب ملێ من كەفت و چوو خوارێ و هەتا دووماهیێ و هەر ئێك و گولەك لێدا و من ئاگەه ژ خوە نەما بتنێ من هەست ب بهنا ئاگری كر و من بزاڤكر لەشێ منێ لڤ لڤیت و من جەنازە راكرن و سەر چالاپكا چووم و تراشەك بەر سینگێ من بوو (قهاری) گازی من كر و ئاگەهدار كرم كو هاریكاربم ئاگری ڤەمرینین دا جەنازە نە سوژن و مە ئاگر تەمراند و (قهار) رابوو باب برایێ وی و پصمام و كورمام ئانكو (18) ژ خێزانا وی ل گەل و گەریا ل سەر كەلاخان دیت هەمی مرۆڤێن وی شەهید بووین و هەمان دەم مە دیت (صدقی) خەلكێ گوندێ(چەلكا سەیدا) بوو رابوو ڤە و پصمام وی (فازل) گازیكر و هەمان دەم تەمام بوو و (صدقی) هەوا ب سەری كەفت و بەرەف نەلێ چوو و ئاگەه ژ خوە نەبوو و دووڤ دا (هاشم) ژی گازی مە كر هەر دو پێن وی دبریندار بوون و چووینە خوار تر مە (عەبابكر) دیت گولەك پێ وی كەفتیە و رەڤی یە چوویە هنداف نەهالێ و مە هێلا گۆت هەرن خوە قورتال بكەن و ئەز قوهار چووین و ئەوا ب توپان دانا كەلاخان ئەم (5) كەس قورتال بووین، (عەبابكەر) ل سالا 2020 وەغەركریە، (قهار) یێ نەخوشە ل مالە(هاشم) خارزایێ (قهار) بوو و ل مالا وان بوو و بابێ وی خەلكێ سلێمانیێ بوو نوكە ل (سلێمانیێ) دژیت،(صدقی چەلكی) سوید دژیت.
ناڤبری گۆت:ل سالا 2006 چوومە دادگەها دكتاتور (صەدام حسێن) ل بەغدا و من (صەدام) بخوە دیت و سێ مەتران ژێ یێ دوور بووم و بزمانێ كورد ئاخفتم و من بەحسا چیرۆكا گوندێ(كورێمێ) كر و (صەدام) پرسیار ئاراستەی داواكاری كر و گۆت چەوا سێ ساجور گوهورین و من گۆت من هەست ب دەنگێ گوهورینا ساجوران كر، پرسیارا دووێ كر و گۆت گوندێ(كورێمێ) چەند ژ سنوری یێ دوورە؟ ئانكو ئەگەر گوند نێزیكی سنوری بیت و من گۆتێ گوندێ مە چەند رۆژان ژ سنوری یێ دوورە و دووماهیێ من گۆتێ (صەدام حسێن) ل گەل (عەلی حەسەن مەجید) و هەر كەسەكێ دەست ل گەل تاوانان هەی بگەهیتە حەقێ خوە .
ل دووماهیێ، شەهیدێ زندی و رزگار بوویێ شالاوا هەشتێ یا ئەنفالان ل دەڤەرا بەهدینان، كەریم نائیف كورێمەی گۆت: داخازێ ژ حوكمەتا هەرێما كوردستانێ دكەم گرنگیێ بدەنە كەسانێن زەحمەت و ماندیبوون دیتی و نەهێنە ژبیركرن و ئەڤرۆ ب ساناهی نەهاتیە و گرنگە ل سەر مە هەمیان وەك چاڤێ خوە ب پارێزین.
