د ڤێ هەیڤێ دا دێ پشكداریێ د سێ فیستەڤالێن سینەمایی دا كەت
شاكر ئەتروشی:
كورتە فلمێ (ASMILE) یێ دەرهێنەرێ كورد(وەلید محەمەد تاهر) دڤێ هەیڤێ دا دێ د سێ فیستەڤالێن سینەمایی یێن جیهانی هێتە نیشادان، كو ئەو ژی ل وەلاتێن (جەزائیر و مەغرب و سەلتەنەت عەمان) بەری دەمەكی ڤی كورتە فلمی ل فیستەڤالا (شارقە) ژی دا خەلاتێ ئێكێ وەرگرتبوو، هەروەسا ل فیستەڤالا هندێ ژی وەك باشترین فلم هاتبوو هەلبژارتن.
وەلید، كو خەلكێ پارێزگەها دهۆكێ یە و ئەڤە چەند سالن ل وەلاتێ هولەندا دژیت، د پەیوەندیەكا تەلەفۆنی دا بۆ رۆژناما ئەڤرۆ گۆت: بەری چەند هەیڤان بەریكانەك بۆ نڤیسینا باشترین سیناریۆ ل وەلاتێ هولەندا هاتبوو رێكخسن و من ژی پشكداری تێدا كربوو، بشتی ئەنجام هاتیە راگەهاندن سیناریۆیا من ب دلێ وان بوو، لەورا پشتەڤانیا مەكر و ئەم رابووین ب وێنەكرنا وی هەر ل هولەندا، دو ئەكتەرێن كورد و سێ یێن هولەندی تێدا د پشكدارن، دەمێ وی حەفت خولەكن، ناڤەرۆكا وی ل دۆر دو كەسانە كو ئەو ژی ژن و مێرەكن ل جهەكی پێكڤە دژین و ئەڤ خێزانە چ گۆهۆڕینان د ژیانا خوە دا پەیدا ناكەن، ئانكو هەموو رۆژێن وان وەكو ئێكن، ژن دچیتە دەوامێ و زەلام ل مال دمینیت، پشتی دەمەكی ژیانەكا نوو دەستپێدكەت و هەتا نوكە ڤی كورتە فلمی پشكداری د نەه فیستەڤالێن جیهانی دا كریە.
