شانۆڤانێن دهۆكێ دێ پشكداریێ د فیستەڤالا چەمچەمال دا كەن
رێڤەبەریا گشتی یا رەوشەنبیری و هونەری ل دهۆكێ ـ پشكا رێڤەبەریا هونەرێ شانۆیێ ب هەماهەنگی ل گەل سەندیكا هونەرمەندێن كوردستانێ ـ دهۆك پشكا شانۆیێ دێ شانۆگەریا ب ناڤونیشانێ (هۆشێن تەرمەكی) ژ دهۆكێ، پشكداری فیستەڤالا شانۆیا چەمچەمال – گەرا پێنجێ كەت، كو ژڤانە ل رۆژا ٢٢/ 9/ ٢٠٢٣ ل دەمژمێر ٦ ئیڤاری ل هۆلا رەوشەنبیریا چەمچەمال بهێتە نیشادان.
كاروان سلۆ، هاریكارێ دەرهێنەرێ ڤێ شانۆگەریێ بۆ رۆژناما ئەڤرۆ گۆت: ئەڤ شانۆگەریە ل فیستەڤالا كەركووك یا شانۆیا كوردی ئەوا ل سەر ئاستێ هەر چار پارچێن كوردستانێ دهێتە ئەنجامدان شیایە خەلاتێ باشترین سینۆگرافیا وەرگریت و بەربژاری خەلاتێ باشترین دەرهێنان و باشترین بەرهەم بیت، هەر وەسا دەرهێنەرێ هەمان شانۆگەری بەربژارێ خەلاتێ هونەرمەندێ سالێ بوویە و ئەڤ نیشادانە دێ ل هەیڤا ئۆكتوبەرێ ل فیستەڤالا شانۆیا گەنجان ل ئیراقێ ژی هێتە نیشادان و دێ ل وێرێ ژی نوونەراتیا دهۆكێ كەت، ئەڤ دەستكەفتە و ستافێ ڤی كاری هەمی گەنجێن خودان شیانێن دهۆكێنە و پتریا وان هێشتا قوتابی نە، فیستەڤال ب خوە ل رۆژا 21/9/2023 دەستپێكەت و شانۆگەریا دهۆكێ ل رۆژا 22/9/2023 هێتە نیشادان.
