ژ داهێنان و هزرێن خوە من كەڤالێن پاقژ و رەنگین ئافراندینە
، هەرهین محەمەد:
هونەرمەندێ شێوەكار و رۆژنامەڤان ئەمیر محەمەد سەبری،د دیدارەكێ دا بۆ بەرپەرێ هونەری یێ رۆژناما ئەڤرۆ دیاركركو ئەوی رێیا دروست و پاقژ ژهونەری وەرگرتیە و دیسان ژ هزرا خوە كەڤالێن جوان ل دۆر سرۆشتی بابەتێن نەتەوایەتی چێكرینە.
ئەمیری زێدەتر گۆتژی: ئەگەرێ سەرەكی یێ نەبەرنیاس بوونا شێوەكاران ئەوە بهای نادەنە كەڤالان كو خەلك بكریت، لەورا هەردەم رەخنا من بۆ هونەرمەندێ شێوەكار ئەوە كارێ خوە بێ بها نەكەن و دڤێت هونەرمەند بهای بدەتە كارێ خوە دایێ ب بهابیت و بۆ نموونە هەكە من كەڤالەك چێكر و من بهایەكێ كێم دانا د بازاری دا ل ئەوی دەمی ئەز یێ كارێ خوە بێ بها دكەم، لەورا ب رێژەكا كێم ژ هونەرمەندان هەیە داهێنان د شێوەكاریێ دا كربیت و كەڤالێن ئەوان بەرنیاس بن ل دەرڤەی وەلاتی و ناڤخۆ و ئەگەرێ سەرەكی یێ نەبەرنیاس بوونا شێوەكاری ئەوە بهای نادەنەكەڤالا و خەلك بكریت و ژیارا هونەرمەندی ل سەر بیت و بتنێ هونەرمەند دەمێ خوە دەتە ئەوێ چەندێ كا چ كار بكەت دا كو ژیانا خوە پێ ببورینیتو هەكە ژیارا ئەوی یا باش بیت و داهاتەكێ باش هەبیت چ پێنەڤێت ئەو دێ دەمێ خوە و هونەرێ خوە و ل ئەوی دەمی ژی دێ دا هێنان ژی كەت.
ئەو چەندە ژی گۆت: ئەو كەسێن ب درێژاهیا سالا ژ پەیمانگەها هونەرێن جوان دەرچووین هەموو نە ئەون بووینە شێوەكار، چونكو هندەك ژوان بتنێ باوەرناما وەرگرتی و بوونە مامۆستان، بەلێ یێ كو حەزا هونەری هەبیت ل دەستپێكێ و چووبیتە پەیمانگەها هونەرێن جوان خوە وەستاند بیتیێ بوویە شێوەكار.
دلایەكێ دی دا ئەمیری گۆتژی: ل سالا 1995 من دەست ب كارێ راگەهاندنێ كریە ل ئەوی دەمی رۆژنامەك هەبوو ل هەولێرێ دەرچوو بناڤێ (مەلا مەشهور) رۆژنامەكا كاریكاتور یا رەخنەیی بوو و بۆ دەمێ چەندین سالا من ل ئەوێرێ كاركر و پاشان من ل چەندین جهێن دی كاركر وەكو پێكێشكرنا بەرنامەیان و پەیامنێری ل رۆژنامەیان و دەرهێنان و وێنەگری ل كەنالان و دیزاین بۆ گەلەك گەلەك گۆڤارو پەرتوكان كریە و هەتا نوكە ژی یێ بەردەوامم ل كەنالەكی وەكو دەرهێنەر و ل گۆڤارەكێ وەكودیزاینەر و كارێ راگەهاندنێ و شێوەكاری هەردو بۆ من دخوەشن و هونەری نە، بەلێ دەمێ كەڤالەكی چێدكەم پتر ئارام دبم دچمە دناڤدا، بەلێ راگەهاندنێ ژی تاما خوە یا هەی.
ل دووماهیێ گۆت: گازندا من بۆ هەر سەندیكایەكێ گرێدای هونەری بیت ب ئێك چاڤ سەحكەنە هونەرمەندان چ شێوەكار بیت، یان شانۆڤان بیت، یان مۆزیكژەنبیت، یان هونەرێ مللی بن و یا گرنگ هەموو دناڤ هونەری دا كاردكەن و درێیەكێ را دەربازدبن و پێدڤیە هەموویان وەكو ئێك ب هژمێرن لدووڤ پێشەیا ئەوی و دبیت یێ هەی و چو كاران ناكەت و دبیت نەهێتە هژمارتن هونەرمەند ودبیت بتنێ باوەرنامەك یا وەرگرتی بناڤێ هونەر، بەلێ كارێ هونەری ناكەت و یێ كارەكێ دی ب خوە دكەت و دیسان گازندا من بۆ كەنالان ژی ئەوە چاڤێ خوە بدەنە بەرەبابێ نوو و هزرێن نوو و من رێز بۆ راگەهاندكارێن كەڤن ژی هەیە، چونكو ئەوان گەلەك خزمەت یا كری و خوە وەستاندی و ئەڤ میدیا نوكە یا سەردەم بەرهەمێ دەستێن وانە.
جهێ ئاماژێ یە ناڤهاتی خودان چار پێشانگەهێن تایبەتە و دو پێشانگەه ل دهۆكێ و ئێك ل هەولێرێ و ئێك ل سلێمانیێ ڤەكرینە و دیسان پشكداری پێنچ فیستەڤالێن پەیمانگەها هونەرێن جوان بوویە.
