رۆژنامەیەكا نیۆزلەندی وێنەیێ ژنەكا كورد ب ئالایێ كوردستانێ ڤە بەلاڤكریە
شاكر ئەتروشی:
رۆژنامەیەكا ناڤدارا نیۆزلەندی، وێنەیێ ژنەكا كورد كو ئالایێ پیرۆزێ كوردستانێ د دەستادانە و جلكێن كوردی ل بەرن ل لاپەرێ ئێكێ یێ رۆژنامێ بەلاڤكریە و دیاركریە كو هژمارەكا كوردان ل وی وەلاتی دژین و ئەو ب هەبوونا وان د دلخۆشن.
سارام ئارام، كو ب (دایكا ئالای) دهێتە نیاسین و خەلكا پارێزگەها كەركووكێ یە، د پەیوەندیەكا تەلەفۆنی دا بۆ رۆژناما ئەڤرۆ گۆت: ئەڤە چەند سالن ئەز ب خێزانڤە لڤی وەلاتی (نیۆزلەندا) دژیم و دپرانیا ئاهەنگ و هەلكەفتێن ڤی وەلاتی پشكداردبم و پتریا جاران ژی ب جلكێن كوردی دچم و ئالایێ كوردستانێ ل گەل خوە دبەمە وی جهی و مەرەما من پێ ئەوە ئەز بێژمە وان ئەم كورد ژی مللەتەكین ل سەر رۆیێ ڤی عەردی دژین و مە ئالایێ خوە هەیە، لێ مخابن هەتا نوكە ئەم دبێ دەولەتین و خەلكێ ڤێرە یێ هەڤسۆزە ل گەل دۆزا كوردی و دەبارەی ڤی وێنەیێ من ژی وێ رۆژنامێ د لاپەرێ خوە دا بەلاڤكریە و ئاماژە ب هندێ دایە كو وەك كوردەك من پشكداری د ئاهەنگان وان دا كریە.
