ژەنینا مۆزیكێ دەروونێ مرۆڤی ئارام دكەت
موسا خالد:
رەیان عەبدوالرەحمان، گەنجەكێ قەزا سێمێلێ یە، بۆ دەمێ چەند سالانە ئامیرێ (كەمانێ) دژەنیت، د دیدارەكێ دا بۆ رۆژناما ئەڤرۆ دبێژیت: ژەنینا مۆزیكێ وەكو زمانێ هەستانە د هەر كاودانەكی یان كەش و هەوایەكێ دا هەبیت، هەروەسا ژلایێ دەروونی ژی ڤە تایبەتمەندیا خوە هەیە و دەروونێ مرۆڤی ئارام دكەت، لەورا دەمێ ئەز كەمانێ دژەنم خۆشیەكا جودا ژێ دبینم و بەردەوام خوە ژبیرڤە دبەم.
هەروەسا گۆت: ژبەركو ئەز دەرچۆیێ پەیمانگەها هونەرێن جوانم، ئەڤە دو سالن ئەز خۆلێن فێربوونا مۆزیكێ ب شێوێ زانستی و ئەكادیمی بۆ قوتابیێن ژیێ وان دوازدە هەتا بیست سال ل ناڤەندا وەرزش و لاوان ل سێمێلێ ڤەدكەم، ل دەستپێكێ ب شێوێ تیۆری پاشی پراتیكی و ب رێیا نۆتێن مۆزیكی وان فێردكەم و هیڤیا من ئەوە هەر خودان بەهرەیەك ب تایبەت ژی ئەوێن حەزا مۆزیكێ هەین بهێن شیانێن خوە دیاربكەن دا ئەم هەموو پێكڤە خزمەتا هونەرێ رەسەنێ كوردی بكەین.
