شێوەكارەكێ كورد دێ كەڤالێن خوە بەتە ئامەدێ
هونەرمەندێ شێوەكار (موتەلیب گەردی) پشتی بورینا چەندین سالێن بێدەنگیێ و پشكدارینەكرنێ د پێشانگەهێن هەڤپشكێن هونەرێ شێوەكاری دا، ئەڤ سالە ب ئەنجامدانا چەندین پرۆژێن نوو ڤەگەڕیایە د ناڤ جیهانا هونەری دا ڤە و بریارە ل رۆژا چارێ تشرینا ئێكێ یا ئەڤ سالە پێشانگەهەكا تایبەت ل باژێرێ ئامەدێ یێ باكوورێ كوردستانێ ڤەكەت و 20 كەڤالێن رەنگینێن كوردەواری د باژێرێ ناڤهاتی دا نیشابدەت.
موتەلیب گەردی دیار كر كو پشتی بورینا دەمەكی ژ هونەری دوور كەفتی دووبارە بریار دا دەست ب ئەنجامدانا چالاكیێن خوە یێن هونەری بكەت و 20 كەڤالێن نەخشاندی ب تێكەلكرنا رەنگێن جودا ل باژێرێ ئامەدێ یێ باكوورێ كوردستانێ نیشابدەت و بۆ كوردستان24 گۆت: «پێشانگەها من ب رێیا داخوازنامەكا فەرمی ژ لایێ ناڤەندا دیجلە ڤە هاتیە رێكخستن و داخواز ژ من هاتەكرن كەڤالێن خوە كو هەموو ب بەرگەكێ كوردەواری هاتینە رەنگكرن ببمە باكوورێ كوردستانێ و ل وێرێ نەریتێن جڤاكێ گوندان و تەشی رێسیا ئافرەتێن كورد نیشا ئامادەبوویێن د ناڤ هۆلێ دا بدەم».
هەژی گۆتنێ یە كو ئەڤ پێشانگەهە دێ بۆ دەمێ چار رۆژان یا بەردەوام بیت و ناڤەندا رەوشەنبیری ب فەرمی هونەرمەندێن ناڤدار د بوارێ شێوەكاری و پەیكەرتاشیێ دا داخوازرینە ڤێ پێشانگەهێ.
