فلمێ دەرهێنەرەكێ كورد 60 خەلاتێن جیهانی هەتا نوكە وەرگرتینە
ئەڤرۆ، زنار تۆڤی:
فلمێ سینەمایی ‹مێسی بەغدا› كو ژ دەرهێنانا دەرهێنەرێ كورد سەهیم عومەر خەلیفەیە، خەلاتێ لژنا دادوە‌ری ل فیستەڤالا نێڤدەولەتیا شلینگل ل وەلاتێ ئەلمانیا وە‌رگرت و هەتا نوكە چەندین خەلاتێن جیهانی ل وەلاتێن جۆدا وەرگرتینە.
دە‌رهێنە‌ر سەهیم عومەر خەلیفە بۆ رۆژناما ئەڤرۆ دیار كر: فلمێ (مێسی بەغدا) كو د گەرا 28 ێ یا فیستەڤالا نێڤدەولەتیا فلمێن ‹Schlingel› ل باژێرێ كیمنیتس ل ئەلمانیا پشكداربوویە كو ئەو فیستەڤالە یا تایبەت بوو ب فلمێن زارۆك و گەنجان و ل 23 – 30 ی ئیلۆنا 2023 ێ هاتبوو ئە‌نجامدان و وی فلمی خەلاتێ لژنا دادوەریا گەنجان وەكو باشترین فلم د وێ فیستە‌ڤالێ دا وە‌رگرت.
ناڤهاتی گۆت ژی: فلمێ سینەمایی ‹مێسی بەغدا› د پشكا هە‌ڤركیێن گەرا 42 ێ یا فیستەڤالا نیڤدەولەتیا فلمێن ‹Abitibi-Tmiscamingue› ل كەنەدا و ل پشكا هە‌ڤركیێن فیستەڤالا نێڤدەولەتیا فلمێن ‹BioPic› ل ئیتالیا و فیستەڤالا فلمێن عەرەبی ل رۆتردام ل هۆلەندا دێ پشكدار بیت و دێ هەڤركیێ ل سەر ب دەستڤەئینانا خەلاتێن وان فیستەڤالان كەت و د هەمان دەم دا ئەو فلمە دێ پشكداریێ د چەندین فلمە فیستە‌ڤالێن دیتر یێن جیهانی دا كەت.
سەهیمی هێشتا دیار كر: هیندریك ڤیرتە ب رێیا كۆمپانیا ئەی تیم پرۆدەكشن ل وەلاتێ بەلجیكا، محەمەد ئەكتاش ب رێیا كۆمپانیا میتۆس فلم ل ئەلمانیا و هۆلەندا، ئەو فلمە بە‌رهە‌مئینایە و كۆمپانیا وایلد بۆنچ ئێكە ژ ب هێزترین كۆمپانیێن بە‌لاڤكرنا فلمان ل ئورۆپا، ئەركێ بە‌لاڤكرنا وی فلمی ب ستوویێ خوەڤە گرتیە و ئەز ب هیڤیمە ئەڤ سالە ئەو فلمە چەندین خەلاتێن دیتر وەرگریت.
كورتە فلمێ سینەمایی ‹مێسی بەغدا› هەتا نوكە 60 خەلاتێن جیهانی وەرگرتینە، ل سالا 2022 ێ« وەكو فلمە‌كێ سینەمایی هاتیە بە‌رهە‌مئینان و ئەو فلمە ل هەرێما كوردستانێ هاتییە وێنەكرن.
هەروەسا ئەڤ سالە، دەرهێنەرێ كورد سەهیم عومەر خەلیفە، دێ پشكدارییێ د گەرا دەهێ یا فلمە فیستەڤالا نێڤدەولەتی یا دهۆكێ دا كەت.
