شەڕێ مەتینا زەلامان هەڤیر دكر و 15 ژنكا ژ گوندێن بناڤیێ و مایێ و بێدوهێ نان دپات
دیدار، سالار محەمەد دۆسـكی:
پێشمەرگێ هەر دو شۆڕەشێن ئیلۆن و گولانێ (سالح محەمەد عەلی بناڤی) ژ دایك بوویێ سالا 1948ێ یە ل گوندێ بناڤێ، خواندنا سەرەتایی ل گوندێ بێدهێ تەمامكریە و هەتا پولا دووێ ناوەندی ل دهۆك تەمامكریە، ل سالا 1960ێ هاتیە رێكخستن دناڤا رێكخستنێن پارتی دیموكراتی كوردستان دا، ل سالا 1961 گەهشتیە ناف رێزێن شۆڕەشێ، بوویە ئەندامێ رێكخراوا (رۆژهەلاتێ بەرواری بالا) وەك كادر كاركریە، ل سالا 1963ێ ل شەرێ چیایێ (مەتینا) رۆلەكێ هەرە كاریگەر دبینت دپشتەڤانی و هاریكاریا پێشمەرگەی ل بەرۆكێن شەری، ل كونگرێ شەشێ یێ پارتی دیموكراتی كوردستان رۆلەكێ هەرە بەرچاڤ دگێریت، ل سالا 1964 پشكداری كونگرێ شەشێ یێ پارتی دیموكراتی كوردستان دبیت، و هەمان سال دهێتە هەلبژارتن وەك ئەندامێ لژنا ناوچا ئامێدیێ و ل سالا 1966 پشكداری كونگرێ حەفتێ یێ پارتی بوویە، جهێ باوەری یا خودێ ژێ رازی (ئەسعەد خوشەڤی) بوویە بۆ گەلەك كارێن گرنگ و نهێنی ل دەڤەرێ و گەلەك جاران دهاتە راسپاردن بۆ كارێن دارایی یێن حزبێ ل دەڤەرێ، بەردەوامی دایە كارێ خوەیێ پارتایەتیێ وهەر بۆ هەر كارەكێ پێ هاتبا راسپاردن،ل سالا 1978 گوندێ بناڤێ بەردایە و ب زووری ل باژێرێ دهۆكێ ئاكنجیبوویە، ل سالا 1985ێ گەهشتیە رێزێن شورەشا گولانێ و ل گەل خێزانا خوە ل گوندێن(زڤنگێ، چەم شەسیدا و بناڤێ) ئاكنجی دبیت، ل سالا 1988 وەك سەدان خێزانێن كورد دەربەدەری وەلاتێ توركیا دبیت و بۆ ماوێ چار سالان ل كەمپا (مێردینێ) ئاكنجی دبیت و هەتا سالا 1992ێ ڤەدگەریتە كوردستانێ، هەر دناڤا كەمپێ دا پشكداری دكارۆبارێن رێكخستتنا كوچبەران دا كریە و چارەسەركرنا ئاریشێن وان، رێكەفتی 9/6/2001ێ دهێتە هەلبژارتن وەك ئەندامێ جڤاتا باژێرڤانیێ بۆ ماوێ بیست سالان بەردەوام دبیت هەتا 31/10/2021 كارێ وان بدووماهی دهێت.
پێشمەرگێ هەر دو شورەشێن ئیلون و گولانێ (سالح محەمەد عەلی بناڤی) د دیدارەكێ دا ل گەل رۆژناما ئەڤرۆ گۆت: ژیێ من 12 سال بوون فەرماندێن پێشمەرگەی ژ بەر ژیێ من نەهێلا ببمە پێشمەرگە و هەمان دەم بوومە كەسەك كو بەردەوام هاریكاری یا پێشمەرگەی بكەم وی دەمی من دەست ژ خواندنێ بەردابوو و من دەست هاڤێتە كارێ رێكخستنێ وی دەمی دەڤەرا بەرواریان ب بوو دو بەش، (رۆژهەلات و رۆژئاڤا) و زێدەتر سنورێ كاركرنا مە ل دەڤەرێن (هدێنە، تیلەرێ، دەرگەلێ) بوو و لدووف شیانا مە كار ل گەل هەردوكان دكر، بتنێ كارێ مە رێكخستن و كادری بوو و هەر جهەكێ شەر ل گەل حوكمەتا عیراقێ كەفت بایێ مە هاریكاری یا پێشمەرگەی دكر ژ خوارنێ و نانی و چەكی و هەر تشتەكێ پێدڤی با مە هەمی هاریكاری دگەهاندنێ.
ل دور شەرێ چیایێ مەتینی ژی ناڤبری گۆت: پێشمەرگەی چ خارن ڤیابا مە دروستكر و تەباخ چیێن ژن و زەلام مە هەبوون و دا خارن بۆ هێتە بەرهەفكرن و دا ب دەواران ئەو خارن گەهیتە پێشمەرگەی و دو بارەگا ل (مەتین)ی هاتبوودانان و هەر بارەگایەكی چەند دەوار بۆ هاتبوو نەدابینكرن، دەسپێكا شەرێ (مەتینا) رەحمەتی (ئەسعەد خوشەبی) گازی مەكر و گۆت هەر پێدڤیەكا شەری دێ هوون دابین كەن ژ (بانكا هەتا نهێلێ) دو بارەگا هاتنە ڤەكرن ئێك گوندێ(مایێ) و ئێك (كانی صاركێ) و (9) تەنیر هاتنە چێكرن و رۆژانە (15) ژنكا نان دپات و لدووف هێزێ و چەند هێز چووبا شەری مە زێدەتر نان دپات و زەلاما هەڤیر دكر و ژنان نان دپات، دەسپێكێ مە ژنك برنە (دەرگەلێ) ئەم نەشیاین نانی پێژین دووڤ دا (كانی صاركێ) وێری هەمان دەم نەشیاین و دووڤ دا هاتینە گوندێ (مایێ) و ل گوندێ (مایێ) سێ ئاشێن ئاڤێ هەبوون و هەمی خزمەتا پێشمەرگەی دابوون ل شەرێ(مەتینا) لدووف پێدڤیان رۆژانە هەر گوندەكی ژ (بێدهێ، بناڤێ، مایێ) هندەك ژنك و زەلام بوومە فرێكرن و رۆژانە پێنچ شەش بارێن خوارنێ بۆ پێشمەرگەی دهاتنە هنارتن و شەر (40) رۆژ بەردەوام بوو و پشتی شەری ژی هەتا پێشمەرگەی جهێ، خوە گرتین و جارەكێ توپ ل گوندێ(مایێ) دان و ژنكا نەشیا صوكا چێكەن چونكە دیكێل بلند بوو و گەلەك جاران سێ رۆژا یان دو شەڤا مە نەشیا خوارنێ فرێكەن بۆ پێشمەرگەی، بەلێ پێشمەرگەی یەدەك هەبوو و ئەوانژی هزرا خوە دكر ئەگەر رۆژەكێ خوارن یان نان گیرۆبیت و گەلەك جاران (2یان 3) رۆژا ئەم نەشیاین خوارنێ یان چەكی بگەهینە پێشمەرگەی، دیسا ل شەران ژی دا مە خوارنێن خوش بۆ پێشمەرگەی دروستكرن و لدووڤ پێدڤی و حەزا وان و رۆژانە مە(2 یان 3) پەز بوو پێشمەرگە ڤەدكوشتن و ئەف كارە هەمی بێ بەرامبەر بۆ پێشمەرگەی دهاتەكرن و ژبەر ڤێ چەندێ گەلەك خێزانا ژ گوندان سەربەخۆ خارن و ڤەخوارن و فێقی بۆ پێشمەرگەی دبر و پێشمەرگە وی شەرێ ژ هەر پێدڤیەكێ ڤە بۆ هاتە دابینكرن و گەلەك ژ گەنجان چوونە ناف شورەشێ و دناڤا شەری دا، بتنێ دا خوارنێ بخون و ئەگەر مللەت ل پشتا شورەشێ نەبا شورەشا ئیلونێ ب سەرنەدكەفت.
هێشتا گۆت: دەمێ پێشمەرگە ل شەرێ (مەتینا) شكەستی و حوكمەتێ دەڤەر گرتی و مللەت بوونە دو پشك هندەك گەهشتنە ناف حوكمەتێ و هندەك هاتنە پشت جادێ ئانكو دەڤەرێن رزگاركری و بن كونترۆلا پێشمەرگەی و مەترسی كەفتە سەرمە و حوكمەتا عیراقێ هات و گەلەك دەڤەرگرتن وی شەری گەلەك خەمگین بووم چونكە گەلەك مرۆڤێن مە هاتنە شەهیدكرن و مە گوندێ خوە بەردا و چووینە چیایی و هەر كەسەكێ رێكەك بخوە دیتبا و چوو.
ناڤبری گۆتژی: كەسانێن مینا رەحمەتی و فەرماندە (ئەسعەد خوشەبی) مێرتر و زاناتر نەهاتینە و ئەگەر باهدینان ژ وی نەبا دا حوكمەت هەمیێ دا گرت و خویك ژ خەلكی دهاتە وەرگرتن هەر (9) بۆ خودانی و ئێك بۆ پێشمەرگەی بوو و هەمی دەما عومبارێن پێشمەرگەی د تژی بوون ژ هەر تشتەكێ تەپێدڤی پێ هەبایە و هەمان دەم گەلەك جاران(ئەسعەد)ی خوارن دا خەلكی و گەلەك جاران دا كاغەزەكێ بوومن هنێریت هندەك تەنەكێن گەنمی یان ئاری بدەنە ڤی كەسی.
زێدەتر گۆت: جارەكێ كاغەزەك ژ دەف فەرماندێ خودێ ژێ رازی (ئەسعەد خوشەبی) من گەهاندە خودێ ژێ رازی ( مەلا مستەفا بارزانی) و بارزانی پرسیارا هەمی فەرماندێن پێشمەرگەی ل دەڤەرێ ژمن كرن و گەلەك جاران نامێن نهێنی یێن فەرماندە (ئەسعەد خوشەبی) من گەهاندنە (مەلا مستەفا بارزانی) و هاتن و چوونا و گەهاندنا دەنگ و باس و هەر نامەكا دەڤەرێ هەبا من گەهاندە رەحمەتی (مەلا مستەفا بارزانی) و گەلەك جاران رەحمەتی عاجزبوو و تایبەت سەرە جەبهێن پێشمەرگەی و گەلەك جاران پارە و چەك ژ دەف (مەلا مستەفا بارزانی) من گەهاندینە (ئەسعەد خوشەبی).
زێدەتر گۆت: پێشمەرگەی عومبار هەبوون و هەمی تشت هەبوون(گەنج، جەه، ئار، پتات، برنج، گەلموك ، تیتن) هەر تشتەكێ خوارنێ یێ پێدڤی با ل عومبارێن پێشمەرگەی هەبوو وی دەمی بەرپرسێ بارەگایەكی بووم ل گوندێ (مایێ) ژ بانكا هەتا دگەهیتە ناف نهێلی یا مە خوارن بۆ دروست كر و مە بۆ پێشمەرگە دهنارت، هەرسێ گوندێن(مایێ، بناڤێ، بێدهێ) كو هەرسێ گوند گەلەك ئاكنجیوویی هەنە و مە كرە نووبە هەر خودان دەوارەك بۆ گەهاندنا ئەرزاقی بۆ پێشمەرگەی بگەهینە بانكا، مانگێشكێ و ئەم ل پشت جهێ شەری بووین و شەرێ (مەتتینا) دا دەوارێن مە خوارنێ گەهینە بارەگایێ (بازێ) ئەوانژی دەوارێن خوە هەبوون و ئەو دا وی بارێ خوارنێ و پێدڤیێن پێشمەرگەی گەهینە جهێ شەری ل چیایێ (مەتینا) دەمێ بارەگایێ مە ل گوندێ(مایێ) رۆژانە مە شەش دەوار باردگرن و نان و خوارن دگەهاندنە پێشمەرگەی.
ل دووماهیێ ناڤبری گۆت: ل بەیانا (11) ئادارێ بیرا من دهێت ئەم دناڤا پێشمەرگەبووین و مە تڤنگ هاڤێتن و گەلەك كەیفا مە هات و مە گۆت مللەتێ كورد گەهشتە مافێ خوە، دووماهیێ داخازێ ژ سەركردایەتیا كوردستانێ دكەم زێدەتر چاڤدانێ ل خەلكێ خوە بكەت چونكە ڤی خەلكی گەلەك رەزالەت دیتی یە و مە هیڤی هەنە دێ مللەتێ مە گەهیتە هەمی هیڤیێن خوە.
