روودانێن دهۆكا كەڤن د فلمەكێ دوكیۆمێنتاری دا
سالار محەمەد دۆسكی:
پێخەمەت پاراستنا كەلتور و مێژوویا باژێرێ دهۆكێ و نڤێسین و توماركرن ب شێوەكێ جوان و رێك و پێك، كار ل سەر ئەرشیفكرن و كومكرنا زانیاریان ل سەر باژێرێ دهۆك ژ كەسایەتیێن دیارێن باژێری دهێتەكرن.
دچارچووڤێ بەرنامە و پلانێن ئەنستیوتا كەلەپورێ كوردی دا، ماوەكە ئەڤ بەرنامە دهێتە جێبەجێكرن كو هەموو بیاڤێن ژیانێ بخوە ڤەدگریت، (سیاسی، ئابوری، رەوشەنبیری، كەلتوری، جڤاكی، ئاینی، پێكڤەژیان) قوناغ بۆ قوناغێ ب وێ چەندێ ئەڤ مێژوو یە بەرزە نەبیت و مفا بۆ داهاتی ژێ بهێتە وەرگرتن.
بهار عەلی، رێڤەبەرا ئەنستیوتا كەلەپورێ كوردی زێدەتر بۆ بەرپەرێ هونەری ل رۆژناما ئەڤرۆ گۆت: ژ پرۆژێن مەیدانی (دهۆكا كەڤن) ستافێ مەیدانیێ ئەنستیوتا كەلەپورێ كوردی سەنتەرێ دهۆك، هەڤپەیڤین ل گەل چەندین كەسایەتیێن دیار و بەرنیاسێن باژێرێ دهۆك ئەنجامداینە وەك ( مستەفا بەگ، فەرسەت مەرعی، عەبد یوسف، رەشید محەمەد صالح پیرۆمەری، ئەدیب عەبدوللا زەرو، دەشتی فەق شهاب، مستەفا عەبدولقادر لیناڤایی، جەمیل شەمو) دئەڤان هەڤپەیڤینا دا بەحسێ دهۆكا كەڤن هاتیەكرن و كەسایەتیێن ئەڤی سەردەمی رۆلێن هەین دناڤا جڤاكی دا و كارتێكرنا ئەوان كەسایەتیان ل سەر دهۆكێ چەند بوویە و شێوازێ ژیانا رۆژانە هاتیە بەحسكرن.
بهار عەلی ئەو ژی گۆت: رەنگە گەلەك روودان ل سەدێ بوری ل پارێزگەها دهۆكێ بوری بن، چونكو مللەتێ كورد مللەتەكێ بن دەست بوویە رەنگە ئەو روودان ب دروستی نەهاتبنە توماركرن و ڤەگوهاستن و ئەنجامدانا ئەڤان كارا بزاڤەك بۆ پاراستنا ئەڤێ مێژوویێ و مفا وەرگرتنە بۆ بەرەبابێ نووی و رەنگە ل دهاتی ئەڤە ببنە ژێدەر بۆ ئەنجامدانا ڤەكولینێن زانكۆیێ..
