15 خەلەكێن نوو ژ زنجیرە درامایا (خۆدیك) دێ هێنە وێنەكرن
شاكر ئەتروشی:
سەرۆكێ گرۆپێ بزاڤ یێ شانۆ و سینەما و مۆزیكێ ل باژێرێ زاخۆ، د دیدارەكێ دا بۆ رۆژناما ئەڤرۆ دیاركر كو وان بەرهەڤیێن باش بۆ وێنەكرنا پازدە خەلەكێن نوو ژ زنجیرە درامایا (خۆدیك) كرینە و د هەیڤا رەمەزانا ئەڤ سالەدا دێ ل سەر شاشەیێن كەنالێن (ئەی تیڤی و دەلال تیڤی) هێتە نیشادان.
مەهدی مونیر، سەرۆكێ وی گرۆپی گۆت: مە وەك پشكا درامایێ خوە ئامادە كریە دا كو پشتی دو رۆژێن دی ل زاخۆ و دهۆك دەست ب وێنەكرنا وێ كەین، بۆ رەمەزانا ئەڤ سالە ژی مە پازدە خەلەكە نڤیسینە و هەر ئەز ب خۆ دێ بكارێ دەرهێنانا وان رابم، ڤان پازدە خەلەكان چو پەیوەندی پێكڤە نینە، ئانكو ناڤەرۆكا هەر خەلەكەكێ ل دۆر بابەتەكێ جڤاكی، رەخنەی، كۆمێدی یە، ئەز و هەڤژینا خوە (ئالا عەبدوالرەحمان) دێ رۆلێ سەرەكی تێدا بینین، زێدەباری چەند ئەكتەرێن دی ژ دهۆك و زاخۆ و سێمێلی، ژوانا (حامد نسری، كاروان كۆچەر، سەگڤان عەلی، بەیار محەمەد، ئەحمەد محەمەد) ژ هەولێرێ ژی (گلالە) و ژ سلێمانیێ ژی (سولاڤ عەبدوالرەحمان) دەمێ هەر خەلەكێ ژی ژ پازدە هەتا بیست و پێنج خۆلەكانە و لقا هەشتا پارتی و ئیدارەیا سەربەخۆیا زاخۆ و رێڤەبەریا رەوشەنبیری و هونەری ل زاخۆ دێ پشتەڤانیا مە كەن و هەموو ئەكتەر ژی دێ ب شێوێ خۆبەخش پشكداربن، بۆ زانین ژ سالا 2010 وەرە سالانە ئەم ڤێ درمایێ تۆماردكەین، ژیلی سەردەمێ كۆرۆنایێ كو ب شێوەكێ بەروەخت مە راگرت بوو.
