ل رۆڤیا هژمارەكا پرۆژەیێن خزمەتگوزاری دهێنە جێبەجێكرن
صەباح زوهێر زێباری:
رێڤەبەرێ ناحیا روڤیا راگەهاند، ل ناوچەداریا روڤیا هژمارەكا پرۆژێن جودا جودا یێن خزمەتگوزاری دهێنە جێبەجێكرن و كار ل سەر دهێتەكرن و هژمارەكا پرۆژێن دی د پلانێ دانە، ب هیڤیا وێ ئێكێ نە بودجە بۆ بهێتە دابینكرن و ئەو ژی بهێنە جێبەجێكرن.
منهل شێخ موافق رێڤەبەرێ ناحیا رۆڤیا بۆ روژناما ئەڤرۆ ا دیار كر، ب كوژمێ نێزیكی سێ ملیاران چەند پرۆژەك بۆ ناوچەداریا هاتینە راگەهاندن و بەرێ بنیاتێ بۆ هاتیەدانان و هندەك ژ وان كار لسەر دهێتەكرن ئەو ژی (رێكێن ناڤخویی، رێكێن گوندان، وەكی گوندێ جوجەرا مەزن، كانی هەسپان، ئێك مالا نوی، دێ رێكێن وان هێنە نووژەنكرن و قێركرن). هەروەسا سێ قوتابخانە، ئێك ل سەنتەرێ ناحیێ‌و ل گوندێ قەرەناز و گوندێ دوستەك. هەروەسا چەند پرۆژێن ئاڤێ دەرچووینە ل سەنتەرێ ناحیێ و گوندێ ئیسماڤا و گوندێ قەرەەناز و ئومەسێنان و شێخانوك، كو گەلەك ژ ڤان پرۆژان بەرێ بنیاتێ بۆ هاتیە دانان و كار ل سەر دهێتەكرن و هندەك ل قوناغا تەندەری دانە.
رێڤەبەرێ ناحیێ گۆت ژی: ل پلانا سالا 2023 یا پارێزگەها دهۆكێ ئەم ناحیە ئاگەهداركرینە كو بهایێ 3 ملیاران پرۆژە دێ هێنە جێبەجێكرن، پشتی دیراسەكا باش مە ژی وەكو ناحیا دینارتە پلانا خوە دانا و ئەو پرۆژێن پێدڤی بۆ ڤێ دەڤەرێ د پلانا خوەدا دیاركرن و گەهاندنە پارێزگەها دهۆكێ دا كو بهێنە جێبەجێكرن.
رێڤەبەرێ ناحیا رۆڤیا گۆت: ئەو پرۆژێن مە د پلانا خوە دا دیاركری پرۆژێن رێكێن ناڤخونە و چێكرنا سولینا بهایێ زێدەتر ملیارەكێ، هەروەسا ئاڤاكرنا باخچەكێ زارۆیان ل تاخێ نەوروز روبەرێ 300م، هەروەسا چێكرنا پاركەكا خێزانی ب رووبەرێ 18هزار مەتران، هەروەسا گەهاندنا كارەبا 24 دەمژمێری كو هەموو سازیێن حكومی كارەبا 24 دەمژمێری هەبیت، چونكی رێڤەبەریێن حكومی ل ناحیا روڤیا كارەبا 24 دەمژمێری نینە، هەروەسا پرۆژێ چێكرنا یاریگەهەكا 11 یاریزانی یا چیمەنێ دەستكرد ل سەنتەرێ ناحیا دینارتێ، ئەڤ هەر پێنج پرۆژە د پلانا مە دانە بۆ ڤێ دەڤەرێ بهێنە جێبەجێكرن، ئەم ل وێ باوەریێ نە ل دەمەكێ نێزیك دێ رەزامەندی هێتەكرن و دێ هێنە راگەهاندن.
سەبارەت پرۆژێ جوت سایدێ ناحیا رۆڤیێ ناڤبری گۆت: بودجا وی پرۆژی یا تایبەتە، ڤەدیتن بۆ هاتیەكرن و پشتی ڤەدیتنێ مە ب فەر دیت ئەو جادە بهێتە قێركرن ب دوو ساید دگەل چێكرنا سولینێن ئاڤێ، مە بلندكریە و گەهاندیە پارێزگەهێ هەتا رەزامەندی ل سەر بهێتەدان.
