فلمێ دەرهێنەرەكێ كورد دێ ل سینەمایێن نەرویج هێتە نیشاندان
فلمێ (جیران) یێ دەرهێنەرێ كورد (مانۆ خەلیل) پشتی بدەستڤەئینانا ب دەهان خەلاتان د فیستەڤالێن نێڤدەولەتی دا ل رۆژا 10ی چریا دویێ یا سالا 2023 دێ ل سینەمایێن نەرویج هێتە نیشادان.
مانۆ خەلیل، دەرهێنەرێ فلمێ ناڤهاتی بۆ رووداو دیار كر كو پشتی كو فلمێ وی د 200 فیستەڤالێن نێڤدەولەتی دا پشكداربووی و شیایی 60 خەلاتان بدەستڤەبینیت بریارە ل رۆژا 10ی چریا دویێ یا سالا 2023 دێ ل سینەمایێن نەرویج هێتە نیشادان و ئەو ب خوە ژی ل 16ی هەمان هەیڤ دێ چیتە وی وەلاتی.
ناڤهاتی ئاماژە دا وێ چەندێ كو ژبلی پشكداریا فلمێ وی د فیستەڤالێن سینەمایی دا ل سینەمایێن چەندین وەلاتان هاتیە نیشادان ژ وان ئەمریكا، سویسرا، كەنەدا، ئیسرائیل و بریارە د دەمێ داهاتی دا ل سینەمایێن دانیمارك و سوێد و فینلەندا ژی بهێتە نیشادان.
جیران، ژ نڤیسین و دەرهێنانا (مانۆ خەلیل)ی یە و د ناڤ ڤی فلمی دا بەحسێ چیرۆكا زارۆیەكێ كورد د سالێن هەشتێیان دا دكەت كو ل ئێك ژ گوندێن سنووری یێن رۆژئاڤایێ كوردستانێ ژیایە و ژمارەكا ئەكتەرێن كورد و عەرەب تێدا د پشكدارن.
