پشتی ڤەقەتیانێ دێ هندەك بەرهەمێن نوو بەلاڤ كەت
سترانبێژ و شیوەكار(دەز دەنیز) كو خەلكا باژێرێ میدیادێ یە ل باكورێ كوردستانێ و ئەڤە بیست و چار سالن ل وەلاتێ ئەلمانیا دژیت، د دیدارەكێ دا بۆ رۆژناما ئەڤرۆ دیاركر كو وێ بەرهەمێ خوە یێ ئێكێ ل سالا 2007 بەلاڤكریە و هەتا نوكە سێ بەرهەم و چەندین كلیپ و سترانێن سینگل بەلاڤكرینە، ل گەل هندێ ئەو كارێ شێوەكاریێ ژی دكەت و هەتا نوكە (35) كەڤال ل سەر سرۆشتێ كوردستانێ و چەندین بابەتێن دی چێكرینە.
ناڤهاتیێ گۆت: ئەڤە دەمەكێ درێژبوو، ئەز ژسترانگۆتنێ دووركەفت بووم، بەلێ من ب بەردەوامی كارێ شێوەكارییێ دكر، د سالا نوو دا جارەكا دی ئەز دێ دەست ب سترانگۆتنێ كەم و من ل بەرە چەند سترانێن نوو بەلاڤ بكەم و دێ هندەك كلیپان ژی چێكەم، هەروەسا ئەز دێ چەندین كەڤالێن نوو ژی چێكەم و نوكە سترانگۆتن و شێوەكاری بوویە پارچەكا گرنگ ژ ژیانا من، دیسان ئەز هەلبەستان ژی دنڤیسم و ب شێوێ راپ سترانان دبێژم و ژ بلی زمانێ كوردی، ئەز ب زمانێ ئەلمانی و ئینگلیزی ژی سترانان دبێژم و هەتا نوكە ب زمانی ئینگلیزی من سترانێن دویت ل گەل سترانبێژێن بیانی گۆتینە و ئەز ژنا كورد گەلەك ب سەركەفتی دبۆارێ هونەری دا دبینیم.
