نیان عەبدوللا دێ بەرهەمەكێ نوو تۆماركەت
سترانبێژا كورد (نیان عەبدوللا) پشتی قورتالبوونا وێ ژ نەخۆشیا وێ یا دژوار جارەكا دی ڤەگەریا د ناڤ كارێ هونەری دا ڤە و نوكە مژوولی چێكرنا بەرهەمەكێ نوو یە بناڤێ (سوپاس).
سترانبێژا ناڤهاتی دیار كر كو ئەو یا دلخوەشە كو دووبارە ڤەگەریایە د ناڤ كارێ هونەری دا پشتی ل هەیاما بوری تووشی نەخوەشیەكا دژوار بووی و بۆ كوردستان24 گۆت: «نوكە دووبارە ئەز دشێم سترانان بێژمەڤە و خزمەتا هونەری بكەم».
نیانێ خویا كر كو سترانا سوپاس ئێكە ژ وان بەرهەمان یێن كو وێ دڤێت ب رێیا ڤێ سترانێ سوپاسیا وان كەسان بكەت یێن كو د رۆژێن سەختێن نەخۆشیا وێ دا هاریكاری و پشتەڤانیا وێ كرین و هێزەك دایە وێ بۆ وێ چەندێ بشێت ل سەر نەخۆشیا خوە ب زالبیت و گۆت: «نوكە رەوشا ساخلەمیا من یا جێگیرە و ل دەمەكێ نێزیك ژمارەكا سترانێن دی ب شێوەیێ ڤیدیۆكلیپ دێ بەلاڤ كەم».
سترانا (سوپاس) ژ تێكستا هێمن مام نادر و ئاوازا خەلیل عەبدوللا یە ل ڤینۆ پرۆدەكشن هاتیە تۆماركرن و میكس و ماسترینگا ڤی بەرهەمی ل وەلاتێ توركیا هاتیە ئەنجامدان.
