هەوراز محەمەد: سینەما كوردی یا بوویە دیفاكتۆ
هەوراز محەمەد فلمسازەكە، چەندین جاران پشكداری د فلمە فیستیڤالا دهۆكێ دا كرییە، د دیدارەكێ دا بۆ رۆژناما ئەڤرۆ دیار كر: ئەڤ سالە گەرا دەهێ یا فلمە فیستیڤالا دهۆك یا نێڤدەولەتی هاتە گێران و ئەڤە دەها شانازییێ یا سینەمایا نەتەوەكێیە، هەڤدەم دبیتە فیستیڤالا ئێكێ د مێژوویا سینەما كوردیدا كو شیابیت دەهەكێ ب رەنگەكێ بەردەوام و بێی دابرین هەبیت، بۆ فلمسازێن كورد ژی ئەوە، كو سەدەیا دەربازبوونا سینەمایێ گرنگتر دبیت، هەروەسا ب تنێ سێ سال ماینە بۆ هندێ كو ژییێ فلم و سینەما كوردێ ببیتە سەدەیەك، چاڤێ هەموویان ل پێشڤەبرن و پیشكەفتن و خەملا رەنگ و خالێن ناسناما سینەما نەتەوەكێنە، كو رەنگە وەك نەتەوەیێن دیتر خودانا جوگرافییەكا سیاسی و دانپێدانا نێڤدەولەتی نەبیت، بەلێ چونكی خۆدانا دۆزەكا سیاسییا رەوایە و فلمسازان ژی دۆزا ئەڤێ نەتەوێ كرییە پێشەنگا پرس و بابەتێن فلمێن خۆ.
ناڤهاتی گۆت ژی: سینەما كوردی بوویە دیفاكتۆ ملبملێ سینەما نەتەوەیێن دیتر، كو خۆدانا سینەما و رەوتا فیلمسازییێ د وێ ناڤەندێ دا و دروستبوونا ژیانا سینەمایی و ب پیشەبوونا سینەمایێ دناڤا ئەڤی گەلی دا بوویە پشكەك ژ ژیانا خەلكێ مە، فیستیڤال ژی خالا گەشەكرنێ و دیاركرنا ڤی رەوتییە و پێگەهەكە بۆ ب ئێكگەهشتنا هزر و خەیال و دونیابینیا كوردان و فلمسازان ل هەر چار پارچان و ل دەرڤەیی وەلاتی ژی، هەروەسا گرنگییا مانا فیستیڤالێ و بەردەوامی و گەشەكرنا رۆل و كاریگەرییا درێژمەودایێ ل سەر رەوت و بیركرنا پاشەرۆژا سینەمایا كوردی دهێتە دانان، پیرۆزە دەه سالێن خەبات و بەردەوامیدانا فلمە فیستیڤالا دهۆكێ.
