مەلا نەجم: دڤێت هەموو كورد شانازییێ ب فلمە فیستەڤالا دهۆكێ بكەن
مەلا نەجم، بەرهەمهێنەر و ئەكتەرە، هەروەسا پشكا فلمسازیێ ل كولیژا هونەرێن جوان ل سلێمانییێ ب دووماهی ئینایە، هەتا نوكە پشكداری د هەشت گەرێن فلمە فیستەڤالا دهۆكێ دا كرییە، د دیدارەكێ دا بۆ رۆژناما ئەڤرۆ دیار كر: پار من كارەكێ گرنگ ژی هەبوو، بەلێ ژبەر رۆلێ گرنگێ فلمە فیستەڤالا دهۆكێ بۆ دەمێ چار رۆژان من پشكداری تێدا كر و نوكە فلمە فیستەڤالا دهۆكێ ئێكە ژ فلمە فیستەڤالێن هەرە باش ل سەرانسەری كوردستانێ و دڤێت هەموو كورد شانازییێ پێ بكەن، چونكی ژ هەمی لایانڤە یا بێ كێموكاسییە و من هیڤی هەیە، كو ئەو فلمە فیستەڤالە دێ باشتر بیت.
ناڤهاتی گۆت ژی: هەردەم من ڤیایە پشكداییێ د فلمە فیستەڤالا دهۆكێ دا بكەم، ئەڤ سالە ژی من ب دو بەرهەمان پشكداری د گەرا دەهێ یا فلمە فیستەڤالا دهۆك یا نێڤدەولەتی دا كرییە، وەكو رێڤەبەرێ بەرهەمی، كو ئەو فلم ژی د پشكا پێشبركێن فلمان دانە، ئەو ژی فلمێ (غەریبانە لەم خۆشبەختانە دەروانم)، كو فلمەكێ درێژە و ژ دەرهێنانا سینا محەمەدە، هەروەسا كورتە فلمێ (سێ گۆشە) كو ژ دەرهێنانا خانما دەرهێنەر ژینۆ هادییە، ئەز یێ گەشبینم كو دێ فلمێن مە خەلاتێن فلمە فیستەڤالا دهۆكێ بدەستڤە ئینن و دیسان هیڤیا سەركەفتنێ بۆ فلمە فیستەڤالا دهۆكێ و هەموو سینەماكارێن پشكداری تێدا كری دخوازم.
