كچ هەر یا جوانە و قەیرە نابیت
بێوار حەمدی:
قەیرەبوونێ پتر كارتێكرنا خوە ل سەر رەگەزێ مێ هەیە و ب تایبەت دناڤ جڤاكێ كوردی دا، دەروونناسەك ژی دبێژیت: دەما كچ قەیرە دبیت ژ پاشەڕوژا خو دترسیت و هزر دكەت دێ مینیت و كەس پێ رازی نابیت، لەوما هێدی هێدی خۆ ژ جڤاكی دوور دكەت.
ئەیاد عەبدوللا، دەرونناس و شارەزایێ جڤاكی یە، د دیدارەكێ دا بۆ رۆژناما ئەڤرۆ دیار كر كو تەمەنێ گونجایی بۆ قەیرەبونێ لدووڤ كەلتور و جڤاكی دمینیت، بەلێ دپتریا جڤاكان دا ژ 30 تا 35 سالیێ دەسپێدكەت وگۆت (قەیرەبونێ پتر كارتێكرنا خو ل سەر رەگەزێ مێ هەیە ب تایبەت دناڤ جڤاكێ كوردی دا، چونكی جڤاك وەسا هزر دكەت هندی كچ یا بچووك بیت باشترە ژ بۆ هەڤژینیێ و ئینانا زاروكان).
دەروونناسی دیار كر ژی كو كارتێكرنێن قەیرەبونێ پتر ل دەڤ كچێ دیار دبن و بتایبەت ژلایێ دەروونی ڤە هندەك نەخۆشی لدەڤ پەیدا دبن وەكو (دوودلی، ترس، خەموكی) ژ پاشەڕوژا خۆ دترسیت و هزر دكەت دێ مینیت و ئێدی كەس پێ رازی نابیت و گۆت: (لەوما هێدی هێدی خوە ژ جڤاكی دوور دئێخیت و د مالدا ژی هزر دكەت كەس چاڤدێریا وێ ناكەت وەكی وێ چەندێ كو ل گەل زەڵامەكی بژیت).
دەرونناس ئەیاد د بەردەوامیا ئاخفتنێن خۆدا دیار كر كو د جڤاكێ كوردی دا پتر چاڤێ وان ل سەر كچێ یە دەمێ تەمەنێ وێ مەزن دبیت بەروڤاژی كوڕی، ئەڤە ژی پتر دلگرانیێ لدەڤ كچێ دروست دكەت و كچێ پتر تووشی گڤاشتن و نەخوشیێن دەروونی دكەت و گۆت: (دڤێت ئەم كچێ وەسا تێبگەهینین كو ئەو كەسەكا خودان شیان و بهێزە و بەردەوام پشتەڤانیا وێ بكەین دا بەر ب ئارمانجێت خو بچیت و دەستا نە داهێلیت و هەست ب تنێبونێ نەكەت، پێدڤیە جڤاك ژی ڤان هزر و ئاخفتنێن رەشبین ژ مێشكێ خو دەربێخیت، ژبەركو مەزنیا ژیێ كچێ یان كوری تشتەكێ گەلەك سرووشتیە).
