جارا ئێکێ یە کۆمەلەکا ئافرەتێن کوردان دادمەزرینیت
بهار عەلی
(ئەنجوم یاموڵکی) کچا کەسایەتییا کوردێ بنڤو دەنگ (مستەفا پاشای یاموڵکی) یە، ل سالا ١٨٩٥ ل باژێرێ سلێمانیێ ژدایک بوویە و ل سالا ١٩٧٠ ل پاریس چوویە بەر دلۆڤانیا خودێ.
ئەنجوم ئێکەم ئافرەتە کو ل تورکیا بۆ ئێکەم جار کۆمەلەکا ئافرەتێن کوردان دادمەزرینیت، د بوارێ مافێن ژنانادا چالاکڤانەک بێ وێنە بوو، داخواز دکر ئافرەتان د بزاڤێن نەتەوەیی ب شێوازەک مۆدێرن پشکدار ببن، ل سالا ١٩١٩ ل ئیستەنبۆلێ ب سەرکاتییا خوە کۆمەلەیەکی دادمەزرینیت، ڤەکۆلانێ دەربارێ ماف و ئازادیا ئافرەتێن کوردان د ناڤ جڤاکیدا دکەت، گەلەک ڕۆل و کاریگەری دناڤ ڤێ کۆمەلێدا ھەبوویە.
نڤیسەرێن تورک دبێژن : (ئەنجوم یامولکی، ھێمایە د دیرۆکا کورداندا!) چونکە ئەو ئێکەم کەسە ل رۆژھلاتا ناڤیندا بەحسێ ماف و ئازادیێن ئافرەتان بکەت. د وان کاروباراندا بابێ وێ (مستەفا پاشای یاموڵکی) گەلەک ھاندەر و پشتگیرا وێ بوویە.
(ئەنجوم یاموڵکی) زمانزانەک باش بوویە، ددەما ئاخاڤتن و گۆتاردانێ گەلەک ڕەھوان بوویە، ئافرەتەک ب ویقار و کبار بوویە، ژبەر ھشیاری و زیرەکییا وێ خەلکی حەز ژێ کریە. ئێک ژوان ئافرەتان بوویە کو د دیوانا (سوڵتان حەمید) یێ ئاخفتی و ڕاگەھاندیە کو پێویستە ئافرەتێن کوردان د ھشیاریا نویخواز و ھەڤچەرخدا پشکدار ببن، بێ جیاوازی ڕەگەز، زمان و ئایین خەباتێ بکەن و پشکداریێ د ژیانا نوو دا بکەن.
(ئەنجوم یامولکی) گەلەک خەبات کر و بزاڤ کر، ئافرەتان بشێن بخوینن و ئاستێ ڕەوشەنبیرییا خوە بلند بکەن. پشتی دامەزراندنا دەولەتا تورکیا، ئاوارەی ئورۆپا بوو، ل وەلاتێ فرەنسا ئاکنجی بوو، ھەر ل وێرێ ژی چوو بەر دلۆڤانیا خودێ.
